الماتىدا بالالار ۋلانعان قوناق ءۇي تەكسەرىلدى
بۇل تۋرالى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى،
ۆەدومستۆونىڭ مالىمەتىنشە، 11- شىلدەدە تاڭعى ساعات 04:50 دە قالالىق توتەنشە جاعدايلار دەپارتامەنتىنەن شۇعىل حابارلاما تۇسكەن. تۇندە قوناق ءۇيدىڭ 407 بولمە مەن 4- قاباتتىڭ دالىزىندە جاندىكتەردەن دەزينسەكتسيالىق وڭدەۋ جۇرگىزىلگەنى بەلگىلى بولدى.
«ساعات 08:40 تا الماتى قالالىق سانيتارلىق-ەپيدەميولوگيالىق باقىلاۋ دەپارتامەنتى مەن ۇلتتىق ساراپتاما ورتالىعى فيلالىنىڭ ماماندارى 407، 409، 417 قوناق ءۇي نومىرلەرىندە جانە 4- قابات دالىزىندە اۋاداعى فورمالدەگيد، دەگيدروسۋلفيد، اممياك، حلورسۋتەگى جانە حلوردىڭ كونتسەنتراتسياسىن انىقتاۋعا زەرتحانالىق-اسپاپتىق زەرتتەۋلەر جۇرگىزدى. ناتيجەسىندە شەكتى اتالعان زاتتاردىڭ نورمالاردان اسۋ جاعدايى انىقتالعان جوق»، - دەپ حابارلادى قالالىق سانيتارلىق- ەپيدەميولوگيالىق باقىلاۋ دەپارتامەنتىنەن.
بارلىق زارداپ شەككەندەرگە دەر كەزىندە مەديتسينالىق كومەك كورسەتىلدى. دەنساۋلىقتارى جاقسارۋىنا بايلانىستى زارداپ شەككەن 13 بالا مەن 1 جاس ءوسپىرىم سول كۇنى تاڭعى ساعات 09:30 دا بالالارعا شۇعىل مەديتسينالىق كومەك كورسەتۋ ورتالىعىنان شىعارىلدى. تاعى ءتورت بالانىڭ جاعدايى اۋىر دەپ باعالاندى.
الماتى قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە، بۇگىنگى كۇنى بالالاردىڭ جاعدايى تۇراقتى.
«دەپارتامەنت مامانى بالالار زارداپ شەككەن قوناق ۇيدەن ولاردى كوشىرۋدى ۇيىمداستىردى. سونداي-اق، پاۆلودار قالاسىنان كەلگەن زارداپ شەككەن بالالاردىڭ اتا-انالارىن ورنالاستىرۋعا كومەك كورسەتتى»، - دەپ اتاپ ءوتتى ۆەدومستۆو.
ەسكە سالايىق، 11- شىلدە كۇنى الماتىنىڭ قوناق ۇيلەرىنىڭ بىرىندە ءتورت بالا حيميالىق زاتتان ۋلاندى. ولاردىڭ بالالارعا شۇعىل مەديتسينالىق جاردەم ورتالىعىنا جەتكىزىلگەنىن حابارلاعان بولاتىنبىز.
