قازاقستانداعى ءىرى ەلدى مەكەندەردىڭ ينفراقۇرىلىمدارىن سيفرلاندىرۋ قاي جىلى اياقتالادى

نۇر-سۇلتان. قازاقپارات – ق ر يندۋستريا جانە ينفراقۇرىلىمدىق دامۋ مينيسترلىگى اكىمدىكتەرمەن بىرلەسىپ وڭىرلەردىڭ ينجەنەرلىك ينفراقۇرىلىمى تۋرالى دەرەكتەردى سيفرلاندىرۋ جانە تولتىرۋ بويىنشا جۇمىس جۇرگىزۋدە.

بۇل ءىس-شارا «سيفرلاندىرۋ، عىلىم جانە يننوۆاتسيالار ەسەبىنەن تەحنولوگيالىق سەرپىلىس» ۇلتتىق جوباسى شەڭبەرىندە ىسكە اسىرىلۋدا، دەپ حابارلايدى قازاقپارات ق ر يندۋسريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

اتاپ ايتقاندا، 2024-جىلعا دەيىن ەلىمىزدەگى ءىرى ەلدى مەكەندەردىڭ ينجەنەرلىك ينفراقۇرىلىمىن تولىققاندى سيفرلاندىرۋ جوسپارلانىپ وتىر. بيىل اقتوبە، قاراعاندى، وسكەمەن، ليساكوۆ (قوستاناي وبلىسى) جانە ارىس (تۇركىستان وبلىسى) قالالارىنداعى قۇرىلىس جۇرگىزىلگەن 9,3 مىڭ گەكتار اۋماققا ينجەنەرلىك نىسانداردى تۇگەندەۋ جۇمىستارى جۇرگىزىلۋدە. 2022-جىلدىڭ العاشقى جارتىجىلدىعىنىڭ قورىتىندىسى بويىنشا اتالعان وڭىرلەردەگى 3,8 مىڭ گەكتار اۋماقتاعى ينجەنەرلىك كوممۋنيكاتسيالار تۇگەندەلگەن.

جەرگىلىكتى بيۋجەت قاراجاتى ەسەبىنەن ەلدى مەكەندەردىڭ 10,7 مىڭ گەكتار اۋماعىندا جەراستى جانە جەرۇستى كوممۋنيكاتسيالارىن تۇگەندەۋ جۇرگىزىلۋدە.

ينجەنەرلىك كوممۋنيكاتسيالاردىڭ سيفرلىق دەرەكتەرى قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسىنە ەنگىزىلەدى. بۇل رەسپۋبليكانىڭ بۇكىل اۋماعىندا قاجەتتى اقپاراتتى جيناۋدى، وڭدەۋدى، ساقتاۋدى جانە ۇسىنۋدى ءبىرىڭعاي ەسەپكە الۋدى قامتاماسىز ەتەدى.

بۇگىندە قالا قۇرىلىسى كاداسترىنىڭ دەرەكتەر قورى ينجەنەرلىك كوممۋنيكاتسيالار دەرەكتەرىنىڭ 63,7 پايىزىن (328 مىڭ گەكتار) قامتيدى. ينفراقۇرىلىمدىق دەرەكتەرمەن جۇمىس ىستەۋ ءۇشىن جەرگىلىكتى اتقارۋشى ورگاندار مەن تابيعي مونوپوليالار سۋبەكتىلەرى ءۇشىن ءبىرىڭعاي ينفراقۇرىلىمدىق دەرەكتەر گەوپورتالى اشىق بولادى.