دانيال احمەتوۆ شەكارا ماڭىنداعى اۋىلداردىڭ قالاي داميتىنىن ايتتى

نۇر-سۇلتان. قازاقپارات - شىعىس قازاقستان وبلىسىندا شەكارا ماڭىنداعى اۋماقتار مەن بۇرىنعى اۋدان ورتالىقتارىن دامىتۋ جۇمىستارى ءجۇرىپ جاتىر.

بۇل تۋرالى شىعىس قازاقستان وبلىسىنىڭ اكىمى دانيال احمەتوۆ ايتتى، دەپ حابارلايدى قازاقپارات ءتىلشىسى.

«اۋماقتاردى دامىتۋ تاقىرىبىن جالعاستىرا وتىرىپ، وبلىستاعى ماڭىزدى باعىت - شەكارا ماڭىنداعى اۋداندار مەن بۇرىنعى اۋدان ورتالىقتارىن قايتا جاڭعىرتۋدى ايتپاي كەتۋگە بولمايدى. قىتاي حالىق رەسپۋبليكاسىمەن شەكارالاس ورنالاسقان، وبلىس ورتالىعىنان شامامەن 400 شاقىرىم قاشىقتىقتا ورنالاسقان وڭىرلەر ءۇشىن حالىقتىڭ ءومىر ءسۇرۋ ساپاسىن جاقسارتۋعا باعىتتالعان كەشەندى جوسپارلار قابىلداندى»، - دەدى د. احمەتوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، ورتالىق جانە شەت اۋماقتار اراسىنداعى احۋالدى تەڭەستىرۋگە 2020-جىلدان 2024-جىلعا دەيىن بەس جىلدا 183 ميلليارد تەڭگە باعىتتاۋ جوسپارلانعان، ونىڭ ىشىندە 2021-جىلى 43 ميلليارد تەڭگە جۇمسالدى. بيىل وبلىستاردىڭ ءبولىنۋىن ەسكەرە وتىرىپ، 44 ميلليارد تەڭگەگە ءىس-شارالار ىسكە اسىرىلادى.

بۇرىنعى اۋدان ورتالىقتارىن دامىتۋ باعدارلاماسى بويىنشا 2021-2024-جىلدارى الەۋمەتتىك- ەكونوميكالىق جاعدايدىڭ ساپالى وزگەرۋىنە 43 ميلليارد تەڭگە قاراستىرىلعان. ونىڭ ىشىندە 2021-جىلى جوبالاردى ىسكە اسىرۋعا 14 ميلليارد تەڭگە جۇمسالدى، بيىلعى جىلعا 8 ميلليارد تەڭگە ءبولىندى.

«شەكارا ماڭىنداعى اۋماقتار مەن بۇرىنعى اۋدان ورتالىقتارىن دامىتۋ جوسپارلارىن ىسكە اسىرۋدىڭ ەكى جىلدىق ناتيجەسىندە 15 مىڭنان استام جاڭا جۇمىس ورنى اشىلدى، 9 سپورت نىسانى، كوپ پاتەرلى 3 جانە ەكى پاتەرلى 202 (19 مىڭ شارشى مەتر) ءۇي سالىندى، 283 كيلومەتر سۋمەن قامتۋ جۇيەسى تارتىلدى، 156 الەۋمەتتىك نىسان، سونداي-اق 450 كيلومەتردەن استام جولدار مەن كوشەلەر جوندەلدى»، - دەپ باياندادى دانيال احمەتوۆ.