ەلوردا اۋەجايى ەرتەڭنەن باستاپ قىسقارتىلعان كەستەمەن جۇمىس ىستەيدى
«نۇر- سۇلتان قالاسىنىڭ اۋەجايىندا 15-شىلدە مەن 8-تامىز ارالىعىندا جەرگىلىكتى ۋاقىت بويىنشا 11:00 دەن 18:00 گە دەيىن ۇشىپ- قونۋ جولاعىنا جوندەۋ جۇمىستارىن جۇرگىزۋ جوسپارلانىپ وتىر. وسىعان بايلانىستى اۋەجايدىڭ جۇمىس رەگلامەنتى وزگەرەدى»، - دەلىنگەن اۋەجايدىڭ باسپا ءسوز قىزمەتى تاراتقان حابارلامادا.
ۇشۋ قاۋىپسىزدىگىن قامتاماسىز ەتۋ ماقساتىندا مۇنداي جوندەۋ جۇمىسى جىل سايىن جۇرگىزىلەدى. بيىلعى جۇمىستار تۋرالى شەشىم اقپان ايىندا قابىلدانعان.
«اۋەجايدىڭ قىسقارتىلعان جۇمىس كەستەسى تۋرالى اقپارات اۋە كومپانيالارىنا ۋاقتىلى جىبەرىلدى»، - دەپ تولىقتىرادى باسپا ءسوز قىزمەتىنەن. دەمەك، 15-شىلدە مەن 8-تامىز ارالىعىنداعى رەيستەر كەستەسىنە قاجەتىنە قاراي وزگەرىستەر ەنگىزىلەدى.
ايتا كەتسەك، بۇگىن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتى جەرگىلىكتى اتقارۋشى ورگاندارعا ءۇشارال جانە ءۇرجار اۋەجايلارىنداعى جوندەۋ جۇمىستارىن تەز ارادا اياقتاۋ تاپسىرىلعانىن حابارلادى. جەرگىلىكتى اتقارۋشى ورگانداردىڭ اقپاراتى بويىنشا، ءۇشارال اۋەجايىن 20-شىلدەدە، ال ءۇرجار اۋەجايىن تامىز ايىنىڭ باس كەزەڭىندە اشۋ جوسپارلانىپ وتىر. ەكى اۋەجاي ارقىلى سۋبسيديالانعان رەيستەردى ۇيىمداستىرۋ جۇمىستارى مەرزىمىنەن بۇرىن اياقتالعان. ول ءۇشىن قاجەتتى قارجى ءبولىنىپ، رەيستەردى ورىندايتىن اۆياكومپانيالار دا انىقتالدى.
