ەۋروپانىڭ ازاماتتىق اۆياتسيا سالاسى داعدارىسقا ۇشىراپ جاتىر
بۇگىندە ەۋروپا اۋەجايلارى ۇشۋ كۆوتالارىن ەنگىزگەن. سونداي- اق، اۆياكومپانيالار كەستەلەردى قىسقارتىپ، رەيستەردى توقتاتىپ، بيلەت قۇنىن قىمباتتاتقان. بۇل - كومپانيالاردىڭ پايدا تابۋ ءۇشىن ەمەس، كەرىسىنشە بيلەتتەردى از ساتۋ ۇمىتىمەن جاساپ جاتقان قادامى.
ەۋروپادا بولىپ جاتقان داعدارىستىڭ سەبەبى - دەمالىس ماۋسىمىندا ۇشاق بيلەتتەرىنە دەگەن سۇرانىستىڭ شامادان تىس ارتۋى. تيىسىنشە كوپ كولەمدەگى تۋريستەرگە قىزمەت كورسەتۋ ءۇشىن جۇمىس كۇشى جەتىسپەي جاتىر.
بۇعان دەيىن بولعان كارانتيندىك شەكتەۋلەر كەزىندە اۆياكومپانيالار كوپتەگەن قىزمەتكەرلەرىن جۇمىستان قىسقارتقان. ەڭبەككەرلەردىڭ ەندى ءبىر بولىگى ىندەت جۇقتىرىپ، ەم الىپ جاتىر. سونداي- اق، جالاقىنى كوتەرۋدى تالاپ ەتىپ، جۇمىسقا شىقپاي وتىرعان كومپانيا پەرسونالدارى دا از ەمەس. مۇنداي داعدارىس تەك اۆياكومپانيالاردا عانا ەمەس، سونىمەن قاتار اۋەجاي جانە تەمىرجول سالاسىندا دا ورىن الدى.
سوندىقتان، قازىر قىزمەتكەرلەر بارىنشا كەڭەيتىلگەن كەستەدە جۇمىس ىستەپ جاتىر. دەگەنمەن، كەز كەلگەن كىشىگىرىم كەلەڭسىزدىك مول شىعىنعا الىپ كەلۋى مۇمكىن. اتاپ ايتقاندا، كومپيۋتەرلىك جۇيەدەگى قانداي دا ءبىر اقاۋ - ەۋروپا اۋەجايلارىنىڭ جۇمىسىن قۇردىمعا كەتىرەدى. جۇمىس كۇشىنىڭ جەتىسپەۋشىلىگىن شەشۋ ءۇشىن كەيبىر ەلدەردىڭ بيلىگى يمميگراتسيالىق ەرەجەلەردى جەڭىلدەتۋگە كىرىستى. ال، يرلانديا ەگەر دۋبلين اۋەجايىندا كادر جەتىسپەسە، اسكەر تارتۋعا ۋادە بەردى.
اۋەجايلار شەكتەۋ كۆوتالارىن ەنگىزدى
ەۋروپادا اۋەرەيستەرىنىڭ كەشىگۋى مەن توقتاتىلۋى كوبەيگەن. ماسەلەن، Official Aviation Guide دەرەگى بويىنشا، لوندونداعى حيتروۋ اۋەجايىندا كەشىكتىرىلگەن رەيستەر سانى 2019 -جىلمەن سالىستىرعاندا 78 پايىزعا وسكەن.
اۆياكومپانيالار رەيستەردى الدىن الا توقتاتىپ جاتىر
اۆياكومپانيالار جاز ماۋسىمىنا ارنالعان رەيس كەستەلەرىن قىسقارتىپ تاستاپ وتىر. ەندى الىنىپ تاستالعان رەيستەردىڭ جولاۋشىلارى دەمالىستارىن ۇيدە وتكىزەدى. ولار قوناق ءۇي، جالعا العان كولىك جانە بالالار لاگەرلەرىنە جۇمسالعان اقشالارىن ءوندىرىپ الا المايدى.
ماسەلە بۇدان دا شيەلەنىسە ءتۇسۋى مۇمكىن
جاز مەزگىلىنىڭ باسىنان يسپانيا، يتاليا، فرانسيا، بەلگيا جانە پورتۋگالياداعى «Ryanair» كومپانياسىنىڭ بورتسەرىكتەرى، «Brussels Airlines» اۆياكومپانياسىنىڭ ۇشقىشتارى جانە فرانتسيالىق شارل- دە- گولل جەردەن باقىلاۋ قىزمەتتەرىنىڭ جۇمىسسكەرلەرى ەرەۋىلگە شىقتى. ولار جالاقىنى كوتەرىپ، ەڭبەك جاعدايىن جاقسارتۋدى تالاپ ەتىپ وتىر. دەگەنمەن، اتالعان كومپانيالار بۇدان شىعىنعا باتا قويعان جوق. ماسەلەن، ەرەۋىلدەر ناتيجەسىندە «Ryanair» شامامەن 2 پايىز، «Air FrancE « 10 پايىزعا جەتپەيتىن رەيستەرىن جوعالتقان.
ءبىراق، سكانديناۆيالىق «SAS» اۋە كومپانياسى 10 كۇنگە جالعاسقان قىزمەتكەرلەر ەرەۋىلىنەن كەيىن رەيستەردىڭ جارتىسىنان كوبىن الىپ تاستادى. كومپانيا نارىقتا قالۋ ءۇشىن شىعىندارىن قىسقارتىپ جاتىر. دەگەنمەن، باسشىلىق قابىلداعان مۇنداي شەشىمگە كاسىپوداق مۇشەلەرى نارازى.
دەسەك تە، سوڭعى كەزدەرى ەرەۋىلدەردىڭ ءبىرشاما بولىگى تۇراقتالعان. دالىرەك ايتقاندا، «Norwegian Air» ۇشقىشتاردىڭ، «British Airways» تىركەۋ ءبولىمىنىڭ قىزمەتكەرلەرىن جانە شارل- دە- گوللداعى ءورت ءسوندىرۋ جانە جەردەگى باقىلاۋ قىزمەتى جۇمىسكەرلەرىنىڭ سانى قىسقارتىلمايتىن بولدى. اتالعان كومپانيا باسشىلىقتارى ءوز ەڭبەككەرلەرىن ۇستاپ قالۋ ءۇشىن ولاردىڭ تالاپتارىن ورىنداۋ شەشىمىن قابىلداپتى.
بۇل داعدارىسقا قاتىستى حالىقارالىق اۋە ترانسپورتى قاۋىمداستىعىنىڭ (IATA) باسشىسى ۋيللي ۋولش پىكىر ءبىلدىردى. ونىڭ ايتۋىنشا، بۇل - العاشقى داعدارىس ەمەس. سونداي- اق، ۋيللي ۋولش الداعى ۋاقىتتا وسى جاعدايلاردان ساباق الىپ، قورىتىندى شىعاراتىنىن جەتكىزدى.
