مال ۇرلىعىنا قاتىسى بار كۇدىكتىلەر ۇستالدى
سارىاعاش اۋداندىق پوليتسيا بولىمىنە جەرگىلىكتى تۇرعىن ءبىر باس جىلقىسىنىڭ جايىلىمنان ۇرلانعانى بويىنشا شاعىم تۇسىرگەن. اتالعان جايت ق ر ق ك- ءنىڭ 188-1-بابى (مال ۇرلىعى) بويىنشا تىركەۋگە الىندى. حابارلاما الىسىمەن سارىاعاشتىق ءتارتىپ ساقشىلارىنان جەدەل- تەرگەۋ توبى قۇرىلدى.
پوليتسەيلەر ءوز تاجىريبەلەرىنە سۇيەنە وتىرىپ، ۇرىلاردىڭ ىزىنە ءتۇسۋ ءۇشىن شۇعىل جانە جوسپارلانعان ارەكەتتەردى جۇزەگە اسىردى. مال جايىلىمدارىنا شىعىپ، تياناقتى تەكسەرۋلەردى ۇيىمداستىردى. كورگەن- بىلگەندەردەن جاۋاپ الىپ، جان- جاقتى سۇراستىرۋ جۇمىستارىن جۇرگىزدى.
ناتيجەسىندە، پوليسيا قىزمەتكەرلەرى كۇدىكتى رەتىندە وزبەكستان ازاماتىن ۇستادى. تەكسەرۋ كەزىندە كۇدىكتى جاس جىگىت وزىمەن بىرگە مال ۇرلىعىمەن اينالىسقان، ياعني، قىلمىستى ۇيىمداستىرۋشى تاعى ەكى كۇدىكتىنىڭ بار ەكەنىن ايتتى. وسىدان سوڭ پوليتسەيلەر قالعان ازاماتتاردى ىزدەستىرۋ جۇمىستارىن جۇرگىزدى. ولاردى كوپ ۇزاماي قولعا ءتۇسىردى.
جالپى، ۇستالعان ازاماتتاردىڭ ەكەۋى وزبەكستان رەسپۋبليكاسىنىڭ ازاماتى بولسا، ءبىر ازامات جەرگىلىكتى تۇرعىن بولىپ شىقتى. تياناقتى تەكسەرۋ مەن زەردەلەۋ بارىسىندا وسى ۇستالعانداردىڭ مال ۇرلىعىنىڭ 16 جايتىنا قاتىسى بارى انىقتالدى. ال شىعىن كولەمى 10 ميلليون تەڭگەدەن جوعارى ەكەنى بەلگىلى بولدى.
انىقتالعانداي، كۇدىكتىلەر قىلمىس جاساۋ بارىسىندا ءوز رولدەرىن الدىن الا جوسپار بويىنشا ورىنداعان. مىسالى، باستى كۇدىكتى مال جايىلىمىندا قاراۋسىز جۇرگەن جىلقى، سيىرلاردى بايقاعان بويدا جۇك كولىگىنە تيەپ وتىرعان. سودان سىبايلاسى ەكەۋى ۇرلانعان مالداردى ساتىپ الۋشىلارعا، قاساپشىعا ارزان باعادا وتكىزگەن. ولار ۇرلاعان ولجالارىن گازەل كولىگىمەن تاسىمالداعان.
پوليسيا قىزمەتكەرلەرى ايعاقتى زات رەتىندە كۇدىكتىلەردەن گازەل كولىگى مەن ەكى باس جىلقىنى تاركىلەپ الدى. ءدال قازىرگى ۋاقىتتا كۇدىكتىلەر قاماۋعا الىنىپ، سوتقا دەيىنگى تەرگەۋ امالدارى جۇرگىزىلۋدە. ءتارتىپ ساقشىلارى ۇستالعانداردىڭ باسقا دا قىلمىستارعا قاتىستىلىعىن تەكسەرىپ جاتىر.
