جول قۇرىلىسى ماماندىقتارىنا ءبىلىم گرانتتارىن كوبەيتۋ كەرەك – مينيسترلىك

نۇر- سۇلتان. قازاقپارات - ەلىمىزدەگى اۆتوموبيل جولدارىنىڭ ساپاسىن جاقسارتۋ ءۇشىن سالاعا قاجەتتى بىرنەشە ماماندىق تۇرىنە ءبىلىم گرانتتارىن كوبەيتۋ كەرەك.

يندۋستريا جانە ينفراقۇرىلىمدىق دامۋ مينيسترلىگى وسىنداي باستاما كوتەردى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

«جولدى جوبالاۋ، جول قۇرىلىسى مەن جولدى جانە كوپىردى كۇتىپ ۇستاۋ پروفيلدىك ماماندىقتارى بويىنشا مەملەكەتتىك تاپسىرىستى قامتاماسىز ەتىپ، اتالعان ماماندىقتارعا بولىنەتىن ءبىلىم بەرۋ گرانتتارىنىڭ سانىن ارتتىرۋ قاجەت»، - دەلىنگەن مينيسترلىك حابارلاماسىندا.

ۆەدومستۆودان ءمالىم ەتكەندەي، قازاقستاندا اۆتوموبيل جولدارى مەن كوپىر قۇرىلىستارى بويىنشا ماماندار 2015 -جىلدان بەرى دايارلانبايدى.

«اتالعان ماماندىقتار قىسقارتىلىپ، كولىك قۇرىلىسى ماماندىعىنا كىرىكتىرىلگەن. بۇل ماماندىق بويىنشا اۆتوكولىك جولدارىنا ارنالعان پروفيلدىك پاندەر بارلىق ساباقتىڭ 10 پايىزى عانا بولادى. سونداي- اق، ورتا ارناۋلى وقۋ ورىندارىندا مامانداردى دايارلاۋ ەسكى وقۋ باعدارلاماسىمەن جۇرگىزىلەدى جانە دە اتالعان ءبىلىم بەرۋ مەكەمەلەرى زاماناۋي تەحنيكالىق قۇرالدارمەن ءتيىستى دەڭگەيدە جابدىقتالماعان»، - دەپ تولىقتىرادى مينيسترلىكتەن.

وسى ورايدا، ق ر ي ي د م جىلىنا بولىنەتىن ءبىلىم بەرۋ گرانتتارىنىڭ سانىن 500 گە دەيىن ارتتىرىپ، كوللەدجدەردى ۋاقىت اعىمىنا ساي جابدىقتاۋ ماسەلەسىن ۇسىنىپ وتىر.