ۇكىمەت باسشىسى ينفلياتسيانى تومەندەتۋگە قاتىستى تۇسىنىك بەردى

نۇر- سۇلتان. قازاقپارات - ۇكىمەت ۇلتتىق بانكپەن جانە جەرگىلىكتى اتقارۋشى ورگاندارمەن بىرلەسە ينفلياتسيانى تومەندەتۋ تۇرعىسىندا ءىس- شارالار كەشەنىن ىسكە اسىرىپ جاتىر.

بۇل تۋرالى بۇگىن ۇكىمەتتىڭ كەڭەيتىلگەن وتىرىسىندا I جارتىجىلدىقتاعى الەۋمەتتىك- ەكونوميكالىق دامۋ قورىتىندىسىن تالقىلاۋ كەزىندە پرەمەر- مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«ينفلياتسيانىڭ دەڭگەيى جىلدىق ماندە 14,5 پايىزدى قۇرادى. ونىڭ نەگىزگى فاكتورلارى رەتىندە الەمدەگى قولايسىز گەوساياسي جاعداي، تاۋار نارىقتارىنداعى جاھاندىق باعانىڭ ءوسۋى، كورشى ەلدەردەن كەيبىر تاۋارلاردى يمپورتتاۋعا تىيىم سالۋ بولدى. ينفلياتسيانى تومەندەتۋ ءۇشىن ۇكىمەت ۇلتتىق بانكپەن جانە جەرگىلىكتى اتقارۋشى ورگاندارمەن بىرلەسىپ، ينفلياتسيانى باقىلاۋ جانە تومەندەتۋ تۇرعىسىندا ءىس- شارالار كەشەنىن ىسكە اسىرىپ جاتىر»، - دەدى ءا. سمايىلوۆ.

وسى ورايدا ول بۇل قادامدار وتاندىق ءونىم ءوندىرۋ كولەمىن ۇلعايتۋعا، ساقتاۋ مەن تاسىمالداۋ تەتىكتەرىن دامىتۋعا، باعا بەلگىلەۋدى باقىلاۋعا، مونوپولياعا قارسى جانە سىرتقى ساۋدانى رەتتەۋگە باعىتتالعانىن ايتتى.

«سونداي- اق، يمپورتتىق تاۋەلدىلىكتى ازايتۋ بويىنشا ينۆەستيتسيالىق جوبالار جۇيەلى نەگىزدە ىسكە اسىرىلىپ جاتىر. ازىق- تۇلىك تاۋارلارى ماسەلەسىن جۇيەلى شەشۋ ءۇشىن ازىق- تۇلىك قاۋىپسىزدىگىن قامتاماسىز ەتۋدىڭ جوسپارى قابىلدانىپ، ىسكە اسىرىلىپ وتىر»، - دەدى ۇكىمەت باسشىسى.