سامۇرىق- قازىنا قورىنىڭ جۇمىسى تاعى دا سىنعا ىلىكتى
«وتاندىق مۇناي وڭدەۋ زاۋىتتارىندا جۇرگىزىلگەن جاڭعىرتۋ جۇمىستارىنا قاراماستان، جىل سايىن ەلىمىزدە مۇناي ونىمدەرىنىڭ تاپشىلىعى تۋىندايدى. مەنىڭ تاپسىرمام بويىنشا ولاردىڭ قىزمەتىنە تەكسەرۋ جۇرگىزىلدى.
مىسالى، 2020-2021 -جىلدارى بۇل زاۋىتتاردىڭ جۇمىسى 410 رەت جوسپاردان تىس توقتاتىلعان. اتىراۋ مۇناي وڭدەۋ زاۋىتىندا - 372 رەت، پاۆلودار زاۋىتىندا - 14 رەت جانە شىمكەنت زاۋىتىندا - 24 رەت توقتاۋ بولعان.
مۇناي وڭدەۋدىڭ قولدانىستاعى سحەماسى ءتيىمسىز دەلدالدار تابىستىڭ نەگىزگى ۇلەسىن يەلەنىپ، زاۋىتتاردىڭ جەتكىلىكسىز قارجىلاندىرىلۋىنا الىپ كەلدى.
وسىلايشا، ارالاس سحەماعا كوشۋ تۋرالى شەشىم قابىلداندى. بۇل سحەما مۇناي ونىمدەرىنىڭ ماركەتينگىن مۇناي وڭدەۋشى كومپانيالار مەن زاۋىتتاردىڭ وزدەرىنە جۇرگىزۋىن كوزدەيدى. سول ارقىلى تابىستارىن ارتتىرىپ، ال تابىس ءوندىرىستى جاڭعىرتىپ، ەڭبەكاقىنى كوتەرۋگە مۇمكىندىك بەرەدى»، - دەدى پرەزيدەنت.
سونداي- اق، پرەزيدەنت ۇلتتىق كومپانيالاردىڭ تيىمدىلىگىن ارتتىرۋ تۋرالى ناقتى تاپسىرما بەردى.
«ۇلتتىق جانە كۆازيمەملەكەتتىك كومپانيالاردا اكىمشىلىك شىعىستار كولەمدى مولشەردە ساقتالىپ وتىر. بۇل - «سامۇرىق- قازىنا» باسشىلىعىنىڭ كەمشىلىگى. تىندىرىلعان جۇمىس كوپ، تىندىرىلماعانى ودان دا كوپ.
قوردىڭ قالىپتى جۇمىس ىستەۋى ءۇشىن بازالىق تيىستىلىك نورماتيۆتەرىن قايتا قاراۋ قاجەت. ونىڭ قىزمەتىن قايتا جۇكتەۋ ءالى دە وزەكتى.
«سامۇرىق- قازىنا» ءتيىمدى وپەراتسيالىق ورتا قۇرىپ، ۇتىمدى كورپوراتيۆتىك باسقارۋدىڭ ورنىنا بۇرىنعىسىنشا پورتفەلدىك كومپانيالاردىڭ وپەراتسيالىق جانە ساتىپ الۋ قىزمەتىنە، كادر ساياساتىنا تىكەلەي ارالاسىپ وتىر. مۇندايدا قانداي كورپوراتيۆتىك باسقارۋ مەن IPO تۋرالى ايتۋعا بولادى؟
ستراتەگيالىق جوسپارلاۋ جانە رەفورمالار اگەنتتىگىنە ۇكىمەتپەن، «سامۇرىق- قازىنا» قورىمەن بىرلەسىپ، كۆازيمەملەكەتتىك سەكتوردى ودان ءارى رەفورمالاۋ جونىندە ناقتى ۇسىنىستار دايىنداۋدى تاپسىرامىن»، - دەدى مەملەكەت باسشىسى.
ايتا كەتەيىك، ۇكىمەتتىڭ كەڭەيتىلگەن وتىرىسىندا پرەزيدەنت ءۇش مينيسترگە سوگىس جاريالادى.
