باعانى جاساندى جولمەن ۇستاپ تۇرۋ گاز تاپشىلىعىن تۋىنداتۋى مۇمكىن - توقايەۆ
مەملەكەت باسشىسى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا وسىنداي پىكىر ايتتى، دەپ حابارلايدى قازاقپارات ءتىلشىسى.
«قازاقستاننىڭ ەكونوميكالىق جانە الەۋمەتتىك ءال- اۋقاتىندا گاز سالاسى ماڭىزدى ءرول اتقارادى. جاڭا ونەركاسىپ وبەكتىلەرىن ەنگىزۋ جانە ەلدى گازبەن قامتۋ ەسەبىنەن ىشكى نارىقتا گازدى تۇتىنۋ جىل سايىن ارتىپ كەلەدى. كەيىنگى 10 جىلدا ەكى ەسەدەن استام - 9 ميللياردتان 19 ميلليارد تەكشە مەترگە دەيىن ءوستى.
ەلىمىزدە كەلەسى جىلدىڭ وزىندە گاز تاپشىلىعى بولاتىنى تۋرالى بولجامدار ايتىلىپ ءجۇر. بۇل رەتتە، گازدى ەكسپورتتىق نارىقتان ىشكى نارىققا قايتا باعدارلاۋ - ۆاليۋتالىق ءتۇسىمنىڭ جوعالۋىنا جانە ساۋدا تەڭگەرىمىنىڭ ناشارلاۋىنا اكەلەتىن ءماجبۇرلى قادام ەكەنىن ءتۇسىنۋ كەرەك»، - دەدى قاسىم- جومارت توقايەۆ.
پرەزيدەنت اتالعان پروبلەمانى شەشۋ ءۇشىن رەسۋرستىق بازانى ۇلعايتىپ، گازدى قايتا وڭدەۋ شارالارىن جولعا قويۋ قاجەتتىگىن ەسكە سالدى.
«گاز ءوندىرۋ مەن وڭدەۋدى ۇلعايتا وتىرىپ قانا مەملەكەت ەكسپورتتان پايدا تاۋىپ، ىشكى قاجەتتىلىكتەردى تولىق كولەمدە قامتاماسىز ەتە الادى. سوندىقتان، گاز ءوندىرۋ جونىندەگى جاڭا جوبالاردىڭ فيسكالدىق پرەفەرەنسيالارىن پىسىقتاعان ءجون.
سونداي- اق، ۇكىمەت ۇلتتىق كومپانيالار اراسىندا فۋنكسيالاردى ناقتى بولۋگە ءتيىس. ءبىز سۇيىتىلعان مۇناي گازىنىڭ بولشەك ساۋداداعى باعاسىن رەتتەۋ مەرزىمىن وسى جىلدىڭ سوڭىنا دەيىن ۇزارتۋعا ءماجبۇر بولدىق. الايدا، بولاشاقتا باعانى جاساندى جولمەن ۇستاپ تۇرۋ تاپشىلىققا اكەلۋى مۇمكىن. بۇل - نارىق زاڭى. سوندىقتان، ۇكىمەت باعا اۋىتقۋلارىنا جول بەرمەي، ساۋدا- ساتتىقتى باستاۋ شارالارىن قابىلداۋى كەرەك»، - دەدى مەملەكەت باسشىسى.
ايتا كەتسەك، پرەزيدەنت قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا گەولوگيالىق اقپاراتتىڭ اشىقتىعىنا جاۋاپتىلاردىڭ ارەكەتىن سابوتاجعا تەڭەدى.
اۆتور ەسىمجان ناقتىباي
