رەسەيدەن كەتكەن كومپانيالارعا قازاقستاندا رەلوكاتسيا قالىپتاستىرۋ كەرەك - پرەزيدەنت

«ءبىز ينۆەستيتسيالىق كاپيتال ءۇشىن جاھاندىق كۇرەس بولىپ جاتقانىنا كۋا بولىپ وتىرمىز. 1400 شەتەلدىك ءىرى كومپانيانىڭ تەڭ جارتىسى جۇمىسىن توقتاتىپ، رەسەي نارىعىنان كەتتى. ۇكىمەتكە قازاقستاندا سولاردىڭ قولايلى رەلوكاتسياسىنا جاعداي جاساۋ كەرەك. بۇل بىزگە ورتا جانە جوعارى بولىنىستەگى تاۋارلاردىڭ ءوندىرىسىن ارتتىرۋىمىزعا مۇمكىندىك بەرەدى.
مەن ۇكىمەتكە قايتا وڭدەۋ ونەركاسىبىندەگى ينۆەستيتسيالىق جوبالاردىڭ پۋلىن ازىرلەپ، ولاردى الەۋەتتى ينۆەستورلارمەن بىرگە پىسىقتاۋدى تاپسىرعان بولاتىنمىن. بۇل جۇمىس ءالى كۇنگە دەيىن ماجىلىستەر مەن كەزدەسۋلەر رەجيمىندە ءجۇرىپ جاتىر. ناقتى ناتيجەلەر ازىرگە از، ماقتانارلىق كورسەتكىش جوق. شىنداپ كەلگەندە جاڭا جوبالار جوق»، - دەگەن مەملەكەت باسشىسى بۇل ماسەلەنىڭ سۇراۋى اكىمدەر مەن مينيسترلەردەن دە بولاتىنىن ەسكەرتتى.
«تاعى قايتالاپ ايتام، بارىنەن بۇرىن جوبالار وڭىرلەردە دە، جەرگىلىكتى ورىنداردا ىسكە اسىرىلادى. سوندىقتان، وعان ينۆەستيتسيا تارتىپ، تۇپكىلىكتى ناتيجەگە جەتۋ جونىندە اكىمدەردەن دە مينيسترلەردەن سياقتى سۇراۋ بولادى»، - دەدى قاسىم- جومارت توقايەۆ.
ايتا كەتەيىك، ۇكىمەتتىڭ كەڭەيتىلگەن وتىرىسىندا پرەزيدەنت ءۇش بىردەي مينيسترگە سوگىس جاريالادى. قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە جانە كيىك سانىنا قاتىستى ماسەلەنى وڭتايلى شەشە الماعانى ءۇشىن ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆكە.
اۆتور ەسىمجان ناقتىباي