پرەزيدەنت ۇكىمەتتىڭ جۇمىسىن ورتاشا دەپ باعالادى

نۇر-سۇلتان. قازاقپارات - ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ مينيسترلەر كابينەتىنىڭ جۇمىسىنا ورتاشا دەگەن باعا بەردى، دەپ حابارلايدى قازاقپارات ءتىلشىسى.

«جالپى، ۇكىمەتتىڭ جۇمىسىنا ورتاشا دەگەن باعا بەرۋگە بولادى. ۇكىمەت تاباندىلىق تانىتۋعا تىرىسۋدا. ءبىراق، قازىرگى كەزەڭدە بوساڭسۋعا بولمايدى. جۇمىس قارقىنىن بارىنشا كۇشەيتۋ قاجەت. جاڭا، تىڭ ءادىس-تاسىلدەردى قولدانۋ كەرەك. ۇكىمەت جەدەل ارەكەت ەتەتىن وپەراتيۆتىك شتاب قانا ەمەس، ناقتى رەفورمالاردى ۇسىناتىن جانە جۇرگىزەتىن باستى مەملەكەتتىك مەكەمە بولۋى كەرەك»، - دەدى قاسىم-جومارت توقايەۆ.

مەملەكەت باسشىسىنىڭ اتاپ وتۋىنشە، قازاقستاندا ەكونوميستەر، كاسىپكەرلەر كوپ.

«شەتىنەن ءبىلىمدى، دارىندى. ءبىراق، ولاردىڭ ناقتى ۇسىنىستارى از، ءتىپتى، جوق دەپ ايتۋعا بولادى. كۇزگە قاراي، مۇمكىن، كادرلىق شەشىمدەر قابىلداۋ كەرەك بولادى. ەرەكشە داعدارىس جاعدايىندا بۇل وتە قاجەت ەكەنى تۇسىنىكتى»، - دەدى پرەزيدەنت.