مۇنداي قۇلدىراۋ كوپتەن بەرى بولعان ەمەس - پرەزيدەنت حالىق تابىسىنىڭ تومەندەۋى تۋرالى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا حالىقتىڭ تابىسىن ارتتىرۋ باعدارلاماسىن سىنعا الدى، دەپ حابارلايدى قازاقپارات ءتىلشىسى.

«سوڭعى جىلدارى حالىقتىڭ تابىسى بىرتىندەپ ءوستى. بىلتىر بۇل ءوسىم 5 پايىز شاماسىندا بولدى. ءبىراق، الماتى، اتىراۋ، قىزىلوردا، ماڭعىستاۋ جانە تۇركىستان وبلىستارىندا جۇرتتىڭ تابىسى ورتاشا رەسپۋبليكالىق دەڭگەيگە جەتپەيدى. بۇل كورسەتكىش الماتى جانە شىمكەنت قالالارىندا دا تومەن. ال، قىزىلوردا وبلىسىندا حالىقتىڭ تابىسى ءتىپتى ازايىپ كەتتى. بيىل مامىر ايىندا ازاماتتاردىڭ ناقتى تابىسىنىڭ كورسەتكىشى مينۋس 2,9 پايىز بولدى»، - دەدى پرەزيدەنت.

مەملەكەت باسشىسىنىڭ ايتۋىنشا، مۇنداي قۇلدىراۋ كوپتەن بەرى بولعان ەمەس.

«حالىقتىڭ تابىسىن ارتتىرۋ باعدارلاماسى قابىلداندى. ءبىراق، ونىڭ جۇرتقا تيگىزىپ جاتقان پايداسى شامالى. ەڭ الدىمەن، جەرگىلىكتى جەرلەردە ءتيىمدى جۇمىس جۇرگىزىلۋى كەرەك. اكىمدەر جىل سايىن ءاربىر 10 مىڭ تۇرعىنعا 100 جاڭا جۇمىس ورنىن اشۋعا ءتيىس. مەنىڭ بىلۋىمشە، بۇل باعىتتا ناقتى ناتيجە جوق. تاعى دا ەسكەرتەمىن. ءوڭىر باسشىلارىنىڭ جۇمىسىن باعالاعان كەزدە وسى كورسەتكىشكە باسا ءمان بەرەمىز. جۇمىس ورىندارىن اشۋ جۇرتتىڭ الەۋمەتتىك جاعدايىنا تىكەلەي اسەر ەتەدى. ەكونوميكانىڭ تۇراقتى دامۋى دا وسىعان بايلانىستى. سوندىقتان، ۇكىمەت اكىمدەرمەن بىرلەسىپ، بۇل مىندەتتىڭ قالاي ورىندالىپ جاتقانىن تالداۋعا ءتيىس»، - دەدى قاسىم-جومارت توقايەۆ.

ايتا كەتەيىك، پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.