كيىك - قازاق ءۇشىن كيەلى جانۋار - پرەزيدەنت مينيسترگە سوگىس جاريالادى

نۇر- سۇلتان. قازاقپارات - پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆكە سوگىس جاريالادى، دەپ حابارلايدى قازاقپارات ءتىلشىسى.

«سالالىق مينيسترلىككە قاتىستى ايتساق، مينيسترگە سوگىس جاريالايمىن. بىرىنشىدەن، سوگىس جوعارىدا ايتقان كەمشىلىكتەر ءۇشىن بەرىلىپ وتىر. سونداي-اق، كيىكتەردىڭ كەلەشەك تاعدىرى تۋرالى تۇسىنىكسىز اۋرە-سارساڭ مەن پىكىرتالاس قالىپتاستىرعانى ءۇشىن سوگىس جاريالانادى. مۇنىڭ ءبارىن قوعامدىق تالقىلاۋدىڭ وسىنشالىق دەڭگەيىنە شىعارۋدىڭ قاجەتى نە؟ بۇل ماسەلەگە ۇلتىمىزدىڭ مەنتاليتەتىن ەسكەرە وتىرىپ، كاسىبي تۇرعىدا كەلۋ كەرەك. شىنىمەن دە، كيىك - قازاق حالقى ءۇشىن كيەلى جانۋار بولىپ ەسەپتەلەدى»، - دەدى قاسىم-جومارت توقايەۆ.

پرەزيدەنت، سونداي-اق، 80 مىڭ كيىكتى اتۋ ماسەلەسى تۋرالى پىكىر ءبىلدىردى.

«تابيعي لاندشافتان 80 مىڭ باس كيىكتى الىپ قويۋ، ياعني ءولتىرۋ تۋرالى ۇسىنىس ەنگىزىلىپ وتىر. ءبىراق، باسقا دا تاسىلدەرى بار شىعار. ماماندارمەن اقىلداسىڭىزدار. ال بۇل - ەڭ شەتىن شارا عوي. مەن بۇل شاراعا دا جۇگىنۋىمىز مۇمكىن ەكەنىن جوققا شىعارمايمىن. ءبىراق، بۇل - شەتىن شارا، قايتالاپ ايتام. بۇل ماسەلەگە كاسىبي تۇرعىدا كەلۋ كەرەك»، - دەدى مەملەكەت باسشىسى.

ايتا كەتەيىك، پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر. وسى وتىرىستا قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە دە سوگىس جاريالاندى.

فوتو: primeminister.kz