بۇرىمى ەكى مەترگە جەتەتىن قازاق قىزى شاش كۇتۋدىڭ قۇپيالارىمەن ءبولىستى
بۇل تۋرالى «تاڭشولپان» باعدارلاماسى حابارلايدى. ءمولدىر بەكجان شاشىن 9 جاسىنان باستاپ وسىرگەن. 19 جىل بويى بۇرىمىن ءوسىرىپ كەلە جاتقان ارۋ بۇگىندە شاش كۇتۋدىڭ ءتۇرلى قۇپيالارىن مەڭگەرگەن. سەبەبى ول شاشىنىڭ ءوزىن - قۇندىلىق ەكەنىن جاقسى تۇسىنەدى. «اپتاسىنا ەكى رەت جۋامىن. كەيدە ءبىر-اق رەت جۋاتىن كەزدەر بولادى. لاك دەيتىن نارسەلەردى مۇلدەم قولدانبايمىن. شاشىن كۇندە جۋاتىن ادامدار بولادى عوي. ول زيان. شاشتى سۋسابىنعا تاۋەلدى ەتەدى، كىرلەگىش بولا تۇسەدى، شاشتىڭ ءارىن كەتىرەدى. ءجيى تاراۋدىڭ ءوزى شاشتى توزدىرادى جانە تۇسىرەدى»، - دەيدى ول.
ءمولدىردىڭ ايتۋىنشا، شاشىن بەلگىلى ءبىر ماقساتپەن وسىرمەگەن. الايدا ۋاقىت وتە كەلە، جيىرما جىلدىق ەڭبەگىنىڭ زايا ەمەس ەكەنىنە كوزى جەتكەن.
«بۇل ۇلكەن ەڭبەك ەكەنىن، وعان شىدامدىلىق كەرەك ەكەنىن ۋاقىت وتە كەلە ءتۇسىندىم. قازىر وسى شاشىمنىڭ ارقاسىندا قانشاما ادام مەنى سۇحباتقا شاقىرىپ جاتىر، ءتۇرلى ۇسىنىستار كەلىپ جاتىر. قازاق قىزى رەتىندە ءوزىمدى كورسەتكىم كەلەدى. وسى ەڭبەگىمە حالىق قۇرمەتپەن قاراسا ەكەن دەيمىن. مەن ءوزىم تابيعاتىمنان نازىكتەۋ، كىشكەنتايلاۋمىن. شاشىمنىڭ ارقاسىندا ەشقاشان كورىنبەي قالعان ەمەسپىن. ورنىم ءبىر توبە بولىپ كورىنىپ تۇرادى. اۋەزوۆ تەاترىندا باسپا ءسوز قىزمەتىندە ىستەگەن كەزدە مەنىمەن بەلدى-بەلدى، حانعا سالەم بەرمەيتىن قانشاما اكتەرلار كەلىپ وزدەرى سالەمدەسىپ، جاعدايىمدى سۇراسىپ، شاشىمنان سيپاپ جاتادى. مۇنىڭ بارلىعى مەنىڭ وسى شاشىمنىڭ ارقاسىندا دەپ ويلايمىن»، - دەيدى بويجەتكەن.
بولاشاقتا ءمولدىر قازاقتىڭ تاريحىن باياندايتىن ۇلكەن كارتينالاردا بوي كورسەتكىسى كەلەتىنىن جاسىرمادى. «شاشىمنىڭ ءارى باردا قازاق قىزىن سومدايتىن رولدەردە ويناعىم كەلەدى»، - دەيدى ول.
