ماڭعىستاۋ مەكتەپتەرىندە ەسىرتكىگە تاۋەلدى بالالاردى انىقتاۋ ءۇشىن ناركوبەكەت اشىلدى

اقتاۋ. قازاقپارات - ماڭعىستاۋداعى ءبىلىم مەكەمەلەرىندە ناركوبەكەتتەر اشىلدى.

بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىستىق ءبىلىم باسقارماسى ادامگەرشىلىك- رۋحاني تاربيە جانە ءوزىن-ءوزى تانۋ ءبولىمى باسشىسىنىڭ مىندەتىن اتقارۋشى ورىنگۇل مامۋتوۆا ءمالىم ەتتى، دەپ حابارلايدى قازاقپارات.

ونىڭ ايتۋىنشا، ناركوبەكەتتەردىڭ قۇرامىندا مەكتەپ باسشىسى، تاربيە جونىندەگى ورىنباسارى، مەكتەپ ينسپەكتورى، پسيحولوگ، الەۋمەتتىك پەداگوگ، سىنىپ جەتەكشى بار.

- ناركوبەكەتتەردىڭ ماقساتى - ءبىلىم ۇيىمدارىنداعى ەسىرتكى زاتتارعا تاۋەلدى جانە ناركولوگيالىق ديسپانسەردە ەسەپتە تۇرعان وقۋشىلارمەن جۇمىس، الدىن الۋ شارالارىن جۇرگىزۋ. بۇگىنگى تاڭدا ناركولوگيالىق ديسپانسەردە ەسەپتە تۇرعان وقۋشى جوق، - دەدى ورىنگۇل مامۋتوۆا.

سونداي-اق، بريفينگتە ماڭعىستاۋ وبلىستىق پوليتسيا دەپارتامەنتى ەسىرتكى قىلمىسىنا قارسى ءىس- قيمىل باسقارماسىنىڭ باستىعى ەدۋارد قۋانايەۆ ءسوز الدى. ونىڭ ايتۋىنشا، ەسىرتكى بيزنەسىنىڭ بارلىق قىلمىستىق ءىس- ارەكەتىنىڭ باستى بۋىندارىنىڭ ءبىرى - جاستاردى ينتەرنەت- رەسۋرستارى ارقىلى ەسىرتكى مەدياسىنا تارتۋ.

- ول جاسىرىن سيپاتقا يە جانە حات الماسۋ جولىمەن كەلىسىلەتىن ۋاعدالاستىق (Telegram, Vipoil قوسىمشالارىندا)، تولەم جۇيەلەرى بويىنشا قولما- قول اقشاسىز تاسىلمەن، بانك كارتوچكا شوتىنا ەلەكتروندى اقشامەن («بيتكوين» جانە باسقا تۇرلەرى) اۋدارۋ ارقىلى جۇزەگە اسىرىلادى. بۇل رەتتە، جەدەل شارا بارىسىندا «نيكنەيم» (ەسىرتكى ساتاتىن ينتەرنەت توبى نەمەسە دۇكەن) ورناتۋ جانە ونى ء«موبيلدى نومىرگە» بايلانىستىرۋ تەحنيكالىق تۇرعىدان مۇمكىن ەمەس. وسىعان بايلانىستى قىلمىسكەردىڭ دەرەكتەرىن جانە ونىڭ ورنالاسقان جەرىن انىقتاۋ قيىنعا سوعادى، - دەدى ەدۋارد قۋانايەۆ.