كەنتاۋ قالاسىنىڭ بۇرىنعى اكىمى پارا العانى ءۇشىن ون جىلعا باس بوستاندىعىنان ايىرىلدى
الماتى قالالىق سوتىنىڭ باسپا ءسوز قىزمەتى حابارلاعانداي، سوتتالۋشى داۋرەن ماحاجانوۆ ءوزىنىڭ قىزمەتتىك جاعدايىن پايدالانۋمەن ج ش س ديرەكتورىنا «قامقورلىق» جاساعانى ءۇشىن ودان مەملەكەتتىك- جەكە كاسىپكەرلىك شارتىنان 50 ميلليون تەڭگە كولەمىندەگى قاراجاتتى بەرۋگە ماجبۇرلەگەن. وسىدان سوڭ زاڭسىز سىياقىنى الۋ ءۇشىن ءوزىنىڭ تانىستارى، اقشانى الۋ بارىسىندا ۇستالعان ب. جانە ت-نى قىلمىستىق ارەكەتكە تارتقان. سوتتالۋشىلار سوتتا وزدەرىنىڭ كىنالارىن مويىنداعان جوق. جازا تاعايىنداۋ كەزىندە سوت سوتتالۋشى ت. جانە م- دا جاس بالالارىنىڭ بولۋى جانە سوتتالۋشى داۋرەن ماحاجانوۆتىڭ قىلمىسىن اشۋ مەن تەرگەۋگە بەلسەندى ىقپال ەتكەنى ءۇشىن ولارعا جەڭىلدەتىلگەن جاعدايدى، سونداي-اق، سوتتالۋشى داۋرەن ماحاجانوۆتىڭ مەملەكەتتىك قىزمەتشىلەر انتىن بۇزعانى ءۇشىن كىناسىن اۋىرلاتاتىن جاعدايدى ەسكەردى.
«سوت ۇكىمىمەن ماحاجانوۆ پارا العانى ءۇشىن كىنالى دەپ تانىلىپ، وعان ءومىر بويىنا مەملەكەتتىك قىزمەتتە ىستەۋىنە تىيىم سالىنىپ، قاۋىپسىزدىگى ەڭ جوعارى قىلمىستىق اتقارۋ جۇيەسى مەكەمەلەرىندە 10 جىل مەرزىمگە باس بوستاندىعىنان ايىرۋ جازاسى تاعايىندالدى. ب. پارا بەرگەنى ءۇشىن كىنالى دەپ تانىلدى. وعان مەملەكەتتىك قىزمەتتە قىزمەت اتقارۋعا ءومىر بويىنا تىيىم سالىندى جانە قاۋىپسىزدىگى ەڭ تومەن قىلمىستىق اتقارۋ جۇيەسى مەكەمەسىندە 1 جىل مەرزىمگە باس بوستاندىعىنان ايىرۋ جازاسى تاعايىندالدى. ت. پارا بەرگەنى ءۇشىن كىنالى دەپ تانىلدى. مەملەكەتتىك قىزمەتتە قىزمەت اتقارۋعا ءومىر بويىنا تىيىم سالىندى جانە قاۋىپسىزدىگى ەڭ تومەنگى قىلمىستىق اتقارۋ جۇيەسى مەكەمەلەرىندە 1 جىل، 6 اي مەرزىمگە باس بوستاندىعىنان ايىرىلدى. «ۇكىم زاڭدى كۇشىنە ەنگەن جوق»، - دەپ حابارلادى قالالىق سوتتان. بۇعان دەيىن كەنتاۋ قالاسىنىڭ اكىمى 100 مىڭ دوللارعا جۋىق پارامەن ۇستالعانىن حابارلاعان بولاتىنبىز.
سونداي-اق، تۇركىستان وبلىسىنىڭ اكىمى ءومىرزاق شوكەيەۆ كەنتاۋ قالاسىن باسقارعان داۋرەن ماحاجانوۆتىڭ قىلمىسى دالەلدەنسە، وتستاۆكاعا كەتۋگە دايىن ەكەنىن ايتقان بولاتىن.
