قازاقستان مەن وزبەكستان عارىش كەڭىستىگىن بىرلەسە زەرتتەمەك
بۇل جونىندەگى ەكى ەل ۇكىمەتى اراسىنداعى كەلىسىم «اشىق» ن ق ا سايتىندا تالقىعا شىعارىلدى.
قۇجاتتا كەلىسىم شەڭبەرىندە اتقارىلاتىن جۇمىس باعىتتارى كورسەتىلگەن.
نەگىزىنەن قازاقستان مەن وزبەكستان تاراپتارى عارىش سالاسىنىڭ ءارتۇرلى باعىتتارىندا كادر دايارلاۋعا، استروفيزيكالىق جانە پلانەتالاردى بىرلەسە زەرتتەۋگە نيەتتى.
«قازاقستان مەن وزبەكستان تاراپى: عارىش كەڭىستىگىن زەرتتەۋ، جەردى قاشىقتان زوندتاۋ، عارىش اپپاراتتارىن جانە ولاردىڭ وزگە دە جابدىقتارىن قۇراستىرۋ، جەرۇستى عارىش ينفراقۇرىلىمىن دامىتۋ، عارىش اپپاراتتارىن ۇشىرۋ، سپۋتنيكتىك ناۆيگاتسيالىق جۇيەلەر مەن تەحنولوگيالاردى ەنگىزۋ بويىنشا كەلىستى»، - دەلىنگەن جۇمىس باعىتتارى ايقىندالعان قۇجاتتا.
سونداي-اق، ەكى ەل عىلىمي جانە تەحنيكالىق مازمۇنداعى اقپاراتتار مەن زەرتتەۋ ماتەريالدارىن ءوزارا ءبولىسىپ وتىرماق.
كەلىسىمدە كورسەتىلگەندەي، بىرلەسكەن جوبالار مەن باعدارلامالاردى ىسكە اسىرۋ ءۇشىن مەملەكەتتىك بيۋجەتتەن جانە وزگە دە كوزدەردەن قارجى تارتىلادى.
