قازاقستاندىق اۆتوكولىكتەردىڭ باعاسىنا ۋتيليزاتسيالىق الىم قوسىلمايدى

نۇر-سۇلتان. قازاقپارات - اۆتوكولىك ءوندىرىسى سالاسىنداعى كاسىپورىندار، ونىڭ ىشىندە «الليۋر» كومپانيالار توبى مەملەكەت تاراپىنان سۋبسيديالانبايدى. ونىڭ ەسەسىنە، وتاندىق كاسىپورىندار ەۋرازيالىق ەكونوميكالىق وداق زاڭناماسىندا قاراستىرىلعان شەكتەۋلەر بويىنشا كەدەندىك تولەمدەر مەن ۋتيليزاتسيالىق الىمداردان بوساتىلدى، دەپ حابارلايدى قازاقپارات ق ر يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ مالىمەتتەرىنە قاراعاندا، ۋتيليزاتسيالىق الىمنان بوساتىلعان ءاربىر اۆتوكولىكتىڭ بىردەي (يدەنتتىك) سوماسىن قايتارۋ جانە ونى تولەۋ مەحانيزمى ارقىلى جۇزەگە اسىرىلادى.

بۇگىنگى تاڭدا ءبىرقاتار بۇقارالىق اقپارات قۇرالىندا «الليۋر» كومپانيالار توبىنا 2019-جىلى 21,3 ميلليارد تەڭگە، 2020-جىلى 40,8 ميلليارد تەڭگە كولەمىندە مەملەكەتتىك سۋبسيديا بەرىلگەندىگى تۋرالى راستالماعان اقپارات جاريالاندى.

«وندىرۋشىلەردىڭ مىندەتتەمەلەرىن ورىنداۋ جونىندەگى باستى وپەراتور رەتىندە «جاسىل دامۋ» ا ق بەلگىلەنگەن بولاتىن. اتالعان كومپانيادان «حالىقارالىق قارجىلىق ەسەپتىلىك ستاندارتى ( IAS) 20» نەگىزىندە ۋتيليزاتسيالىق الىمدى قايتارۋ «مەملەكەتتىك سۋبسيديا» دەپ اتالادى. بۇل ۇعىم اۋديتورلار اراسىندا وسىلاي دەپ اتالادى. وسىعان وراي ب ا ق وكىلدەرى اراسىندا تۇسىنبەستىك تۋىپ، ناتيجەسىندە قاتە اقپارات جاريالاندى»، - دەلىنگەن حابارلامادا.

جوعارىداعى سوما ۋتيليزاتسيالىق الىمنان بوساتىلعان ءوندىرۋشى كومپانيانىڭ بۇعان دەيىن «جاسىل دامۋ» كومپانياسىنا تولەگەن قارجىسى بولىپ تابىلادى.

بۇگىنگى تاڭدا ق ر يندۋستريا جانە ينفراقۇرىلىمدىق دامۋ مينيسترلىگىندە وتاندىق ءوندىرۋشى كاسىپورىنداردى ۋتيليزاتسيالىق الىمنان «تولەم-قايتارۋ» مەحانيزمى ارقىلى ەمەس، ونى تىكەلەي ىسكە اسىرۋدى قاراستىراتىن زاڭناما جەتىلدىرىلۋدە.

تاعى ءبىر ايتا كەتەرلىگى، قازاقستاندىق اۆتوكولىك ءوندىرۋشى كاسىپورىنداردان ۋتيليزاتسيالىق الىمنىڭ الىنباۋىنا بايلانىستى ەلىمىزدە شىعارىلعان كولىك باعاسىنا ۋتيلالىم قوسىلمايدى.