21:19, 13 - شىلدە 2022 | GMT +5
شري-لانكا پرەزيدەنتى ەلدەن قاشىپ كەتتى
نۇر-سۇلتان. قازاقپارات - شري-لانكا پرەزيدەنتى گوتابايا رادجاپاكسا جاپپاي تولقۋلارعا بايلانىستى مالديۆ ارالدارىنا قاشىپ كەتتى، - دەپ حابارلايدى «حابار 24» تەلەارناسى.
تەلەارنا مالىمەتىنشە، 73 جاستاعى پرەزيدەنت ايەلى جانە قاۋىپسىزدىك قىزمەتىنىڭ 2 وكىلىمەن اسكەري ۇشاققا ءمىنىپ كەتىپ قالعان.
گوتابايا رادجاپاكسا بيلىك باسىنا 2019-جىلى كەلگەن ەدى. الايدا پاندەميادان كەيىن ەلدى ەكونوميكالىق داعدارىس جايلاپ، ازىق-تۇلىك پەن جانارماي تاپشىلىعى پايدا بولدى. سالدارىنان مامىردان بەرى جاپپاي نارازىلىق شەرۋلەرى باستالىپ، 9- شىلدەدە اشىنعان حالىق پرەزيدەنت رەزيدەنتسياسىنا باسىپ كىرگەن ەدى.
ال رادجاپاكسا بەلگىسىز باعىتقا باس ساۋعالاپ، سوڭىنان پارلامەنت سپيكەرى ارقىلى ءوزىنىڭ شىلدەنىڭ 13 ءى قىزمەتىنەن كەتەتىنىن حابارلاعان.
