شىنايى پاتريوتيزم اتاق ءۇشىن ەمەس، وتان ءۇشىن ادال قىزمەت ەتۋدەن كورىنەدى – پرەزيدەنت
«ۇلتتىق قاۋىپسىزدىكتى قورعاۋ ءىسى كوبىنەسە ەل نازارىنان تىس جۇرگىزىلەدى. ونى كوپشىلىك بىلە بەرمەيدى. دەگەنمەن، سىزدەردىڭ جۇمىستارىڭىزدىڭ ءمان-ماڭىزى ايرىقشا. شىنايى پاتريوتيزم اتاق ءۇشىن ەمەس، وتان ءۇشىن ەلگە ادال قىزمەت ەتۋدەن كورىنەدى. ءبىز ەل مۇددەسىن قورعاۋ جولىندا قۇربان بولعان قاھارمانداردى ەشقاشان ۇمىتپايمىز. ولاردىڭ ەرلىك ىستەرى جۇرتقا جاريالانبايدى. ءبىراق، ەسىمدەرى ۇلتتىق قاۋىپسىزدىك قىزمەتىنىڭ جىلناماسىنا التىن ارىپپەن جازىلادى. كوميتەت ارداگەرلەرىنە كوپ جىلعى ەڭبەگى ءۇشىن زور العىس ايتامىن»، - دەدى قاسىم-جومارت توقايەۆ.
مەملەكەت باسشىسى قازاقستان شەكاراشىلارىنىڭ شەكارا جانە اۋماقتىق سۋلار رەجيمىن بۇزعان 7 مىڭنان استام ادامدى ۇستاعانىن اتاپ ءوتتى.
جالپى قۇنى 8 ميلليارد تەڭگەدەن اساتىن ۆاليۋتا، التىن جانە باسقا دا تاۋارلاردىڭ زاڭسىز تاسىمالىنىڭ جولى كەسىلگەنىن ايتتى.
سونىمەن قاتار، ارناۋلى قىزمەتتىڭ اقپاراتتىق قاۋىپسىزدىكتى سەنىمدى قامتاماسىز ەتىپ وتىرعانىنا نازار اۋداردى.
ماڭىزدى ينفراقۇرىلىمدىق نىساندارعا جاسالعان 1,5 مىڭ DDoS شابۋىلعا تويتارىس بەرىلگەن.
بۇعان دەيىن حابارلاعانىمىزداي، پرەزيدەنت ۇلتتىق قاۋىپسىزدىك كوميتەتىنىڭ 30 جىلدىعىنا ارنالعان سالتاناتتى جيىنعا قاتىستى.
