ازاماتتار قۇقىعىنىڭ تاپتالۋىنا جول بەرۋگە مۇلدە بولمايدى - توقايەۆ

نۇر-سۇلتان. قازاقپارات - قاۋىپسىزدىك سالاسىنداعى ستراتەگيالىق ماقساتتاردى جۇزەگە اسىرۋ كەزىندە ازاماتتار قۇقىعىنىڭ تاپتالۋىنا جانە ەلىمىزدە ىسكەرلىك كليماتتىڭ بۇزىلۋىنا جول بەرۋگە مۇلدە بولمايدى.

بۇل تۋرالى پرەزيدەنت قاسىم-جومارت توقايەۆ ۇلتتىق قاۋىپسىزدىك كوميتەتىنىڭ 30 جىلدىعىنا ارنالعان سالتاناتتى جيىندا ايتتى، دەپ حابارلايدى قازاقپارات اقورداعا سىلتەمە جاساپ.

«وزگەرىستەردىڭ ءبارىن تابىستى جۇزەگە اسىرۋ ءۇشىن بىزگە كەز كەلگەن قاۋىپكە ءتيىمدى قارسى تۇرا الاتىن زاماناۋي ارناۋلى قىزمەت كەرەك. ۇلتتىق قاۋىپسىزدىك ورگاندارى ۇلتتىق مۇددەلەردى قورعاۋدا جانە كۇشەيىپ كەلە جاتقان زاماناۋي سىن-قاتەرلەرگە قارسى كۇرەستە الدىڭعى شەپتە بولادى. سوندىقتان، اناليتيكالىق جانە اقپاراتتىق بارلاۋ جۇمىستارىنا باسا ءمان بەرە وتىرىپ، پروبلەمالاردى باستاپقى ساتىسىندا جويۋ قاجەت. قازاقستان جاھاندىق جانە وڭىرلىك قاۋىپسىزدىكتى نىعايتۋعا باعىتتالعان تەڭگەرىمدى ءارى سىندارلى سىرتقى ساياسات جۇرگىزەدى. سوندىقتان، ەلىمىزدىڭ وداقتاسى جانە ستراتەگيالىق سەرىكتەسى سانالاتىن مەملەكەتتەرمەن اراداعى تابىستى ىنتىماقتاستىقتى ارناۋلى قىزمەتتەر سالاسى بويىنشا دامىتۋ وتە ماڭىزدى. قاۋىپسىزدىك سالاسىنداعى ستراتەگيالىق ماقساتتاردى جۇزەگە اسىرۋ كەزىندە ازاماتتار قۇقىعىنىڭ تاپتالۋىنا جانە ەلىمىزدە ىسكەرلىك كليماتتىڭ بۇزىلۋىنا جول بەرۋگە مۇلدە بولمايدى»، - دەدى پرەزيدەنت.

قاسىم-جومارت توقايەۆ ەلىمىزدىڭ جاڭا قازاقستاندى قۇرۋعا كىرىسكەنىن، قوعامنىڭ بارلىق سالاسىندا تۇبەگەيلى جاڭعىرتۋلار جۇرگىزىلە باستاعانىن مالىمدەدى.

مەملەكەت ازاماتتىق قوعامدى دايەكتى تۇردە دامىتىپ، دەموكراتيالىق قاعيداتتاردى قورعايدى.

ايتۋىنشا، بۇل - ەلىمىزدىڭ دامۋى ءۇشىن وتە ماڭىزدى قادام. سوندىقتان، ادىلدىك جانە زاڭ ۇستەمدىگى وسى جولدا باستى باعدار بولادى. پرەزيدەنت مامىر ايىندا ۇلتتىق قاۋىپسىزدىك كوميتەتىن رەفورمالاۋ، ياعني ونىڭ قىزمەتىن تۇبەگەيلى ترانسفورماتسيالاۋ جانە ۇلتتىق قاۋىپسىزدىك جۇيەسىن باسقارۋ ساپاسىن ارتتىرۋ جونىندەگى جارلىققا قول قويعانىن ەسكە سالدى.