مەديتسينالىق ۇيىمداردا كەيبىر ءدارى- دارمەك بولماي قالۋى مۇمكىن
وعان ساتىپ الۋدى جۇزەگە اسىرۋى ءتيىس ۆەب- پورتالدىڭ جۇمىس ىستەمەۋى سەبەپ بولىپ وتىر، دەپ حابارلايدى قازاقپارات «اتامەكەن» ۇ ك پ- گە سىلتەمە جاساپ.
مامىر ايىندا ۇكىمەت تەگىن مەديتسينالىق كومەكتىڭ كەپىلدىك بەرىلگەن كولەمى جانە ءمامس جۇيەسى شەڭبەرىندە ءدارى- دارمەكتەر مەن مەديتسينالىق بۇيىمداردى ساتىپ الۋدى رەتتەيتىن قاعيدالارعا ەنگىزىلەتىن وزگەرىستەردى قابىلدادى. قۇجاتتىڭ جاڭا رەداكسياسىندا ءداستۇرلى تاسىلمەن ساتىپ الۋ پروتسەدۋرالارىن وتكىزۋ مۇمكىندىگى تولىعىمەن الىنىپ تاستالدى. ەندى اۋرۋحانالار بەلگىلى ءبىر ءدارى- دارمەك «س ك- فارماتسيا» ءبىرىڭعاي ديستريبۋتسيا جۇيەسى ارقىلى ساتىپ الىناتىن پرەپاراتتار تىزىمىنە ەنبەسە دە، ولاردى ەلەكتروندى تاسىلمەن عانا ساتىپ الۋى ءتيىس.
«اتامەكەن» ۇ ك پ اتقارۋشى حاتشىسى، باسقارما مۇشەسى نۇرلان ساقۋوۆتىڭ ايتۋىنشا، ساتىپ الۋدى ەلەكتروندى فورماتقا اۋىستىرۋ - قيسىندى ءارى بولجامدى پروتسەسس. الايدا، ساتىپ الۋدىڭ ەلەكتروندى پلاتفورماسىن تولىعىمەن جولعا قويماي جاتىپ، ءداستۇرلى ساتىپ الۋدى الىپ تاستاۋ ارقىلى دەنساۋلىق ساقتاۋ مينيسترلىگى مەديتسينالىق ۇيىمداردى دا، مەديتسينالىق زاتتار مەن تەحنيكانى جەتكىزۋشىلەردى دە تىعىرىققا تىرەدى.
«مەديتسينالىق قىزمەتتەردى كورسەتۋگە قاجەتتى بارلىق پرەپارات پەن مەديتسينالىق بۇيىمداردىڭ بارلىعى «س ك- فارماتسيا» ارقىلى ساتىلا بەرمەيدى. اۋرۋحانالار ءدارى- دارمەكتىڭ كوپتەگەن اتالىمىن ىزدەپ، ساتىپ الادى. قازىرگى كەزدە پورتالدىڭ دايىن بولماۋى سالدارىنان ءونىمنىڭ وسى تۇرلەرىن ساتىپ الۋ تولىعىمەن توقتاپ تۇر. فارماتسيەۆتيكالىق ونىمدەردىڭ وندىرۋشىلەرى مەن جەتكىزۋشىلەرى پورتالعا كىرە الماي وتىر. وسىدان پاتسيەنتتەر - قاتارداعى قازاقستاندىقتار زارداپ شەگىپ جاتىر. دەنساۋلىق ساقتاۋ مينيسترلىگى ازاماتتاردىڭ مۇددەسىن ويلاۋى ءتيىس»، - دەدى نۇرلان ساقۋوۆ.
«اتامەكەن» ۇكپ ماماندارى وسى ماسەلە بويىنشا بيزنەس وكىلدەرىممەن ءبىرقاتار كەزدەسۋ وتكىزگەن. دەنساۋلىق ساقتاۋ ءمينيسترى اتىنا پورتال جۇمىسى جولعا قويىلعانعا دەيىن بۇرىنعى نورمالاردى قايتارۋ قاجەتتىگىنە قاتىستى حات جولدانعان.
