قازاقستاندا جاڭا سۋ كودەكسى ازىرلەنىپ جاتىر

نۇر- سۇلتان. قازاقپارات - قازاقستاندا جاڭا سۋ كودەكسى جوباسى بەكىتىلگەن مەرزىمدە پارلامەنت ماجىلىسىنە ەنگىزىلەدى.

بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتى ءتوراعاسىنىڭ ورىنباسارى دوسبول بەكماعامبەتوۆ ايتىپ بەردى، دەپ حابارلايدى قازاقپارات ءتىلشىسى.

«اگروونەركاسىپتىك كەشەندى دامىتۋ جونىندەگى ۇلتتىق جوبادا 2025 -جىلعا قاراي سۋ ۇنەمدەۋ تەحنولوگيالارىن قولداناتىن جەر كولەمىن 265 تەن 450 مىڭ گەكتارعا دەيىن ۇلعايتۋ كوزدەلگەن. ونەركاسىپتە اينالىمداعى نەمەسە قايتا سۋمەن جابدىقتاۋ كولەمىنىڭ ۇلعايۋى ارقىلى تازا سۋ الۋ كولەمى 1,3 تەكشە كيلومەترگە قىسقارتىلادى»، - دەدى دوسبول بەكماعامبەتوۆ ورتالىق كوممۋنيكاتسيالار قىزمەتىندە.

سونىمەن بىرگە، مەملەكەت باسشىسىنىڭ بيىلعى 8-اقپانداعى كەڭەيتىلگەن ۇكىمەت وتىرىسىنداعى تاپسىرماسىنا سايكەس، جاڭا سۋ كودەكسى ازىرلەنۋدە.

«جاڭا سۋ كودەكسىن قابىلداۋ ەلدىڭ سۋ- رەسۋرستىق الەۋەتىن ساقتاۋ، سۋ ۇنەمدەۋگە ارنالعان قوندىرعىلاردى پايدالانۋعا ىنتالاندىرۋ، سۋ رەسۋرستارى مەن سۋعا سۇرانىستى باسقارۋداعى قوعامنىڭ ءرولىن ارتتىرۋ مەن سالانى عىلىمي قولداۋ ءۇشىن نەگىز بولادى. قازىرگى ۋاقىتتا جاڭا سۋ كودەكسىنىڭ تۇجىرىمداماسى جانە ىلەسپە زاڭ جوباسى ازىرلەندى، ونىڭ تاراۋلارى مەن باپتارى جازىلىپ جاتىر. كودەكس جوباسى بەكىتىلگەن مەرزىمدە پارلامەنت ماجىلىسىنە ەنگىزىلەدى»، - دەدى د. بەكماعامبەتوۆ.