قازاقستاندىق جان كوسوبۋتسكي «انادولى ارىستانىمەن» جەكپە- جەككە شىعادى

نۇر- سۇلتان. قازاقپارات - ەۋروپالىق بوكس وداعى (EBU) قازاقستاندىق جان كوسوبۋتسكي (18-0, 17 كو) مەن تۇركيالىق ۋمۋت دجامكيران (18-0, 17 ك و) اراسىندا ۇيىمنىڭ اۋىر سالماقتاعى بوس چەمپيون تيتۋلى ءۇشىن جەكپە- جەككە سانكتسيا بەردى، دەپ حابارلايدى قازاقپارات Sports.kz كە سىلتەمە جاساپ.

ۇيىمنىڭ رەسمي سايتىندا حابارلانعانداي، مامىلە جاساۋدىڭ سوڭعى مەرزىمى - 18 -شىلدە، سودان كەيىن جەكپە- جەك پروموۋتەرلىك ساۋداعا قويىلادى. بوكسشىلاردىڭ وتىنىشتەرى كەڭەستىڭ ريمدەگى (يتاليا) شتاب- پاتەرىنە تاپسىرىلۋى ءتيىس.

مامىردىڭ 21 نەن 22 سىنە قاراعان ءتۇنى گامبۋرگتە (گەرمانيا) كوسوبۋتسكي فرانتسۋز بوكسشىسى جوان ديۋوپتى (39-7, 26 ك و) جەڭىپ، WBC International تۇجىرىمى بويىنشا اۋىر سالماقتاعى چەمپيوندىق اتاعىن جەڭىپ العان بولاتىن. ال، دجامكيرانعا كەلەتىن بولساق، «انادولى ارىستانى» سوڭعى رەت 14-مامىردا گەرمانيانىڭ ماگدەبۋرگ قالاسىندا رينگكە شىعىپ، ءتورتىنشى راۋندتا چەح لۋكاس ۆاككەردى (3-2، 2 ك و) نوكاۋتقا جىبەرگەن ەدى.