ورالدا قاربىزدان ۋلاندى دەگەن كۇدىكپەن تاعى ءۇش بالا اۋرۋحاناعا جەتكىزىلدى

ورال. قازاقپارات - ورالداعى جازعى لاگەرلەردىڭ بىرىندە قاربىزدان ۋلاندى دەگەن كۇدىكپەن ءۇش بالا اۋرۋحاناعا ءتۇستى، دەپ حابارلايدى قازاقپارات ءتىلشىسى.

ب ق و ت ج د باسپا ءسوز قىزمەتىنەن بەرىلگەن مالىمەتكە قاراعاندا، بۇگىن ساعات 11:49-دا «سامال-3» شاعىناۋدانىنان شاقىرتۋ تۇسكەن. بالالار لاگەرىندە قاربىزدان ۋلاندى دەگەن كۇدىكپەن 15 جانە 16 جاسار ءۇش قىز مودۋلدىك جۇقپالى اۋرۋلار اۋرۋحاناسىنا جەتكىزىلدى.

ولارعا وتكىر گاستروەنتەروكوليت دياگنوزى قويىلدى. وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى ايناگۇل ساقپوسىنوۆانىڭ ناقتىلاۋىنشا، بالالار كەشەدەن بەرى اۋىرعان.

«ونىڭ الدىندا بىرنەشە بالا تۋعان كۇنىن تويلاعان. سوندا قاربىز، تورت جەگەن. تەك ءۇش قىز سىرقاتتانعان. جاعدايلارى قاناعاتتانارلىق. دارىگەرلەر اۋرۋحاناعا جاتقىزۋعا كورسەتكىش جوق دەپ تاپتى»، - دەدى ا. ساقپوسىنوۆا.

ەسكە سالا كەتەيىك، بۇدان بۇرىن ورالدا قاربىزدان ۋلاندى دەگەن كۇدىكپەن ءتورت بالانىڭ اۋرۋحاناعا جاتقىزىلعانىن جازعان بولاتىنبىز.