قازاقستانعا شەتەلدەن اۆتوكولىك اكەلۋ شەكتەلە مە
ول ۇكىمەت باسشىسىنىڭ دەپۋتاتتىق ساۋالعا بەرگەن جاۋابىنان الىنعان. وسىعان بايلانىستى ق ر پرەمەر-ءمينيسترىنىڭ باسپا ءسوز قىزمەتى تۇسىنىكتەمە بەردى، دەپ حابارلايدى قازاقپارات. «بۇگىنگى تاڭدا شەتەلدىك كولىك قۇرالدارىن زاڭنامانى بۇزا وتىرىپ ەلگە اكەلۋ جاعدايلارى جيىلەپ كەتتى. اتاپ ايتقاندا، ۇرلانعان نەمەسە كەپىلگە قويىلعان، جالعان ءنومىر تاعىلعان جانە باسقا دا اۆتوموبيلدەردى پايدالانۋ فاكتىلەرى انىقتالىپ جاتىر. ماسەلەن، وتكەن جىلى عانا باسقا ەلدەردىڭ قۇقىق قورعاۋ ورگاندارىمەن سالىستىرۋ قورىتىندىسى بويىنشا قازاقستانعا اكەلىنگەن 35 مىڭنان استام اۆتوموبيلدىڭ بانك تاراپىنان جانە زاڭ بويىنشا شەكتەۋلەرى بولعانى انىقتالدى. سونىمەن قاتار، 600-دەن استام كولىك ەلگە اكەلۋ كەزىندە ە ا ە و- عا مۇشە ەلدەردىڭ قۇقىق قورعاۋ ورگاندارىنىڭ ىزدەستىرۋىندە بولىپ شىقتى. وسىعان بايلانىستى قازاقستانعا «پروبلەمالىق» اۆتوكولىك اكەلىنۋىنىڭ الدىن الۋ جانە جالپى اكىمشىلەندىرۋدى جاقسارتۋ ءۇشىن كولىك قۇرالدارىن اكەلۋ ەرەجەلەرى (ۋاقىتشا ەرەجەلەردى قوسا العاندا) ازىرلەنىپ جاتىر. وندا مۇنداي اۆتوموبيلدەر بويىنشا باقىلاۋدى كۇشەيتۋ تەتىكتەرى، ءتىپتى ولاردى ەلگە اكەلۋدى شەكتەۋگە دەيىن كوزدەلەتىن بولادى. بۇل رەتتە اتالعان شارالار قازاقستان رەسپۋبليكاسىنىڭ اۋماعىنا زاڭنامانى بۇزباي اكەلىنگەن جانە پايدالانىلاتىن شەت مەملەكەتتەردە تىركەلگەن اۆتوموبيلدەرگە قاتىستى قولدانىلمايدى»، - دەلىنگەن مالىمدەمەدە. بۇعان دەيىن حابارلاعانىمىزداي، ۇكىمەت ەل اۋماعىنا شەتەلدىك اۆتوموبيلدەردى اكەلۋدى شەكتەيتىن تەتىكتەر ازىرلەپ جاتىر.
