13:25, 13 - شىلدە 2022 | GMT +5
ق م د ب وكىلدىكتەرىنە قاراستى قاساپحانالار بولۋى كەرەك - باس ءمۇفتي
نۇر-سۇلتان. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ءىرى قالالاردا قاساپحانا سالۋ جونىندە باستاما كوتەردى.
بۇل تۋرالى ول قۇربان ايت مەرەكەسىن قورىتىندىلاۋ جيىنىندا مالىمدەدى، دەپ حابارلايدى قازاقپارات قمدب سايتىنا سىلتەمە جاساپ.
«قۇرمەتتى باس يمامدار! ءبىز وسىمەن توقتاپ قالماي، جۇمىستارىمىزدى ودان ءارى جەتىلدىرۋ باعىتىندا جۇمىستانۋىمىز كەرەك. الداعى قۇربان ايت مەرەكەلەرىندە مال سويۋ جاعىنان قيىندىقتار تۋىنداماۋى ءۇشىن قمدب وكىلدىكتەرىنە قاراستى قاساپحانالار بولۋى كەرەك دەگەن شەشىمگە كەلدىم. وزدەرىڭىزگە جىل سوڭىنا دەيىن وڭىرىڭىزدەن جاڭادان سالىناتىن قاساپحاناعا ارنالعان جەر ماسەلەسىن شەشۋلەرىڭىزدى جانە ق م د ب «ۋاقىپ قورى» مەن «حالال دامۋ» مەكەمەسىنە ەلىمىز بويىنشا حالال ستاندارتتارىنا ساي كەلەتىن قاساپحانانىڭ ورتاق جوباسىن دايىنداپ شىعۋدى تاپسىرامىن»، - دەدى باس ءمۇفتي ناۋرىزباي قاجى تاعان ۇلى.
