قىتايدا قازاق كۇرەسىنەن وتەتىن چەمپيوناتقا ءۇش اۆتوكولىك تىگىلدى
وندا ولكەنىڭ ءتورت بۇرىشىنان جينالاتىن بالۋاندار كۇش سىناسادى. اتالعان سپورتتىق باسەكەنىڭ جۇلدە قورى دا قوماقتى - 3 اۆتوكولىك تىگىلىگەن، دەپ حابارلايدى قازاقپارات ءتىلشىسى.
«سالاۋاتتى قىتاي. 2030 جوباسى» نەگىزىندە بۇقارالىق سپورتتى دامىتا وتىرىپ، اۋدانىمىز ۇلتتىق ەرەكشەلىككە يە سپورت تۇرلەرىنە ەرەكشە ءمان بەرەدى. سونىڭ ىشىندە كۇرەس ءداستۇرىن دامىتىپ، الىپ كۇش يەلەرىنىڭ قول قارىمىن سىناسۋىمەن بىرگە، اتان تۇيەنىڭ كۇشى - ازاماتتاردىڭ بۇقاشا مويىنمەن تارتىسۋىن دا ۇيىمداستىرىپ وتىرمىز. قازاقشا كۇرەستىڭ ءۇش سالماقتاعى ءتۇرىنىڭ جەڭىمپازدارىنا 3 اۆتوكولىك تىگىلدى» ، - دەپ جازادى جارىستى ۇيىمداستىرۋشىلار. بۇقارالىق سپورت تۇرىندە ۇيىمداستىرىلعان بۇل بايگەگە قاتىسۋشىلاردىڭ ۇلتىنا قاراي شەكتەۋ قويىلمايدى. باستى شارت - جاسى 18-گە تولعان جانە تۇرعىلىقتى جەرى تەك شىڭجاڭ ولكەسى بولۋى. سونىمەن قاتار، بۇرىن كاسىبي بالۋان بولعان بولسا، ارنايى كوماندادان شىققانىنا 3 جىلدان اسۋى تالاپ ەتىلەدى.
قىتايلىق ب ا ق-تىڭ دەرەگىنە سۇيەنسەك، جارىس ءۇش سالماق دارەجەسىندە وتەدى: قازاق كۇرەسى مەن وڭ قول كۇرەسى – 70، 85 كەلىگە دەيىن جانە 85 كەلىدەن جوعارى.
ال، «بۇقاشا تارتىس» دەپ اتالاتىن سپورت تۇرىنەن 85 كەلىگە دەيىنگى جانە 85 كەلىدەن جوعارعى دەپ ەكى سالماق دارەجەسى بويىنشا كۇش سىناسادى. سونىمەن قاتار، قازاق كۇرەسى مەن قول قارىمىن سىناسۋشىلار الدىڭعى التى ورىنعا دەيىن ماراپاتتالادى. ال، «بۇقاشا تارتىستا» الدىڭعى سەگىز ادامعا دەيىن سىيلىق بەرىلمەك.
ايتا كەتەيىك، بۇل جولعى ۇلتتىق سپورت تۇرلەرىن قارجىلاي دەمەۋشىلەر: شارحان قازى ۇلى، ماۋلەن قاسەن ۇلى، ما ميڭلوڭ، نۇرلان ىسقاق ۇلى قاتارلىلار. اتالعان سپورتتىق بايگەنى تىكەلەي ۇيىمداستىرۋشى - ماناس اۋدانى دەنە شىنىقتىرۋ باس قوعامى مەن ماناس اۋداندىق كۇرەس قوعامى.
اۆتور: بەيسەن سۇلتان ۇلى
