اۋعانستاندا بيلىك اۋىسقاندا ق ر ۇلتتىق قاۋىپسىزدىك كوميتەت قالاي ارەكەت ەتتى
ق ر ۇلتتىق قاۋىپسىزدىك كوميتەتىنىڭ 30 جىلدىعىنا ارناپ تۇسىرىلگەن فيلمدە كوميتەت ءتوراعاسىنىڭ ورىنباسارى - سىرتقى بارلاۋ قىزمەتىنىڭ ديرەكتورى عابيت بايجانوۆ سول ءبىر جاۋاپتى كەزەڭ تۋرالى قىسقاشا مالىمەت ايتادى، دەپ حابارلايدى قازاقپارات ءتىلشىسى.
«كەيىنگى بىرنەشە وپەراتسيا اۋعانستانداعى سوڭعى وزگەرىستەر كەزىندە ءوتتى. ول كەزدە تەك بارلاۋشىلار عانا جۇمىس ىستەدى. ولار بۇكىل ادامداردى جيناپ، قاۋىپسىزدىگىن قامتاماسىز ەتتى. تاليباننىڭ جاڭا بيلىگىمەن كەلىسىمدەرگە كەلىپ، بايلانىستار ورناتتى. كەيىن وزگە ورگان قىزمەتكەرلەرىن رەسمي تۇردە ماراپاتتاپ جاتتى. ال ءبىزدىڭ ماماندار ەلەۋسىز، جابىق جارلىقپەن ماراپاتتالدى. ولاردىڭ بۇل ەڭبەگىن جالپاق جۇرت بىلمەگەنىمەن، قانداي جاۋاپتى ءىس اتقارعاندارىن وزدەرى بىلەدى عوي. بارلاۋشى ءۇشىن ەڭ ۇلكەن ماراپات - حالقىنىڭ، ەلىنىڭ اماندىعى»، - دەدى كوميتەت وكىلى.
سونداي-اق، فيلمدە قارسى بارلاۋ قىزمەتىنىڭ ارداگەرى ادامعالي ناقىسپەكوۆ 2000 -جىلى قورعانىس سالاسىنداعى قۇپيانى وزگە ەلدىڭ ازاماتىنا الىپ بەرمەك بولعان ازاماتتى قالاي قولعا تۇسىرگەندەرىن ەسكە الادى.
«2000 -جىلى شەتەل ازاماتى قازاقستاننىڭ اۋماعىندا جاسىرىن ارەكەت ەتپەك بولعان. بۇقارالىق اقپارات قۇرالىنىڭ وكىلى رەتىندە بۇركەمەلەنىپ، اسكەري بۇيىم تۋرالى قۇپيا قۇجاتتى العىسى كەلدى. سول كەزدە ول بۇيىمنىڭ دەرەكتەرى قۇپيا بولىپ سانالاتىن. ءبىزدىڭ ءبىر ازاماتقا شىعىپ، تانىسقان. ءبىزدىڭ ازامات قاجەتتى قۇجاتتى تاۋىپ بەرە الاتىنىن ايتىپ، كەلىسكەن. سولايشا ول اقپارات الۋدىڭ جولدارىن ىزدەي باستادى. ءسويتىپ ءجۇرىپ تاعى ءبىر قازاقستان ازاماتىنا جولىعادى. ول ءبىزدىڭ ورگاننىڭ قۇپيا كومەكشىسى بولىپ شىعادى. بىردەن بىزگە حابارلادى. ءارى قاراي ويىن ءبىزدىڭ باقىلاۋىمىزبەن ءجۇردى. بۇكىل مالىمەتتەر جينالىپ، جاسىرىن ارەكەت ەتۋشىلەردى قىلمىستىق جازاعا تارتۋعا بولاتىنى تۋرالى باعا بەرىلدى. وسىلايشا ەكەۋىنە بۇلتارتپاۋ شاراسى قولدانىلدى. شەتەل ازاماتى 10 جىلعا، ءوز ازاماتىمىز وتانعا وپاسىزدىق جاساعانى ءۇشىن 13 جىلعا سوتتالدى»، - دەدى ادامعالي ناقىسپەكوۆ.
ايتا كەتەيىك، بۇگىن ۇ ق ك-نىڭ قۇرىلعانىنا 30 جىل تولدى.
