ۇكىمەت باسشىسى قازاقستاندا قانشا ميلليون گەكتار جەر پايدالانىلماي بوس جاتقانىن ايتتى
بۇل تۋرالى ق ر پرەمەر- ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«ءبىز عارىشتىق مونيتورينگ ءتاسىلى ارقىلى جەردىڭ پايدالانىلۋىن باقىلايمىز. بۇل نورما بىلتىر وتاندىق زاڭناماعا ەنگىزىلگەن. وسى عارىشتىق مونيتورينگ ناتيجەسىندە 40 ميلليون گەكتار جەر پايدالانباي جاتىر دەگەن اقپارات الدىق. ونىڭ 95 پايىزى - جايىلىم جەرلەرى. جايىلىم جەردىڭ تاپشىلىعى بار ەكەنى بارشامىزعا ءمالىم. ءبىراق ولاردى قايتارۋ ماسەلەسى ءبىر كۇندە شەشىلمەيدى. نەگە دەسەڭىز، كونستيتۋتسيامىزدا جەكەمەنشىك قۇقىقتار قورعالعان. سوندىقتان سول پايدالانبايتىن جەرلەردى قايتارۋ ماسەلەسى سوت تارتىبىمەن شەشىلەدى»، - دەدى ءاليحان سمايىلوۆ ۇلتتىق ارنادا «جاڭا قازاقستان» باعدارلاماسىندا.
ونىڭ ايتۋىنشا، بۇل ماسەلە جونىندە ارنايى كوميسسيا قۇرىلدى جانە بيىل بۇل جۇمىستار جاندانادى.
«بىلتىر پايدالانىلماي جاتقان جەرلەردىڭ 400 مىڭ گەكتارى قايتارىلدى. بيىل مۇنى 5 ميلليون گەكتارعا دەيىن جەتكىزەمىز. ياعني بيىل قايتارىلاتىن جەر كولەمى 12 ەسەگە ۇلعايادى جانە ول جەرلەردى ناقتى پايدالاناتىن، اۋىل شارۋاشىلىق ءونىمىن شىعاراتىن وتاندىق كاسىپكەرلەرگە بەرۋ كەرەك. سوندىقتان بۇل وتە ماڭىزدى سۇراق»، - دەدى پرەمەر- مينيستر.
