قازاق پالۋانى موڭعوليانىڭ جوعارى دارەجەلى «ءپىل» اتاعىن جەڭىپ الدى

بايان-ولگي. قازاقپارات - موڭعوليانىڭ ۇلتتىق مەرەكەسىنە ارنالعان كۇرەس سايىسىندا قانداسىمىز سەرىك بەردىمۇرات ۇلى مەملەكەتتىك ءپىل دارەجەلى پالۋان اتاعىنا يە بولدى.

بۇل تۋرالى قازاقپارات kaznews.mn سايتىنا سىلتەمە جاساپ حابارلايدى. سەرىك بەردىمۇرات ۇلى كۇرەستىڭ 7 كەزەڭىندە مەملەكەتتىك زاان دورجين اناردى جىعىپ، مەملەكەتتىك «زاان» ياعني مەملەكەتتىك ءپىل دارەجەلى پالۋان اتاعىنا يە بولدى.

سەرىك بەردىمۇرات ۇلى جاسىل الاڭدا ە. سۋمياابات (6-كەزەڭ)، س. ءتومورتسووج (5-كەزەڭ)، پ. داۆاادورج (4 كەزەڭ)، ش. چينتۋلگا (3-كەزەڭ)، ب. ولزيسايحان (2-كەزەڭ)، ە. داشزەۆەگ (1-كەزەڭ) قاتارلى پاۋلانداردى ايقىن باسىمدىقپەن ۇتتى.

تەك 8-كەزەڭدە مەملەكەتتىك اۆارگا (قاز. چەمپيون) دارەجەلى پالۋان نامسرايجاۆ باتسۋۋردان ۇتىلىپ قالدى.

سەرىك بەردىمۇرات ۇلى 1994 -جىلى تۋعان. سالماعى 110 كەلى. 2011 -جىلى ايماقتىق ءپىل دارەجەلى پالۋان، 2013 -جىلى ايماقتىق ارىستان دارەجەلى پالۋان، 2017 -جىلى مەملەكەتتىك لاشىن دارەجەلى پالۋان اتانعان بولاتىن.

ايتا كەتسەك، موڭعوليانىڭ ۇلتتىق مەرەكەسى عۇن يمپەرياسىنىڭ 2230، 2231 جىلدىعى، موڭعول يمپەرياسى ورناۋىنىڭ 815، 816 جىلدىعى، ۇلت ازاتتىق قوزعالىسىنىڭ 110، 111 جىلدىعى جانە حالىق رەۆوليۋتسياسىنىڭ 99 جىلدىعىنا وراي ۇيىمداستىرىلدى.