مۇحتار شاحانوۆتىڭ مەرەيتويى وتىراردان باستالدى - فوتو

تۇركىستان. قازاقپارات- قازاقستاننىڭ حالىق جازۋشىسى، قازاقستاننىڭ ەڭبەك ەرى مۇحتار شاحانوۆتىڭ 80 جىلدىق مەرەيتويى وتىرار اۋدانىندا كەڭ كولەمدە اتالىپ ءوتتى، دەپ حابارلايدى قازاقپارات ءتىلشىسى.

الدىمەن اقىن باستاعان ءبىر توپ زيالى قاۋىم ارىستانباب كەسەنەسىنە زيارات جاساپ، قۇران باعىشتادى. سونان سوڭ «وتىرار» مەملەكەتتىك ارحەولوگيالىق مۋزەي- قورىعىنىڭ ساپار ورتالىعىندا «وتىرار وركەنيەتى جانە شاحانوۆ شىڭى» اتتى كەزدەسۋ ءوتتى.

جيىندا ساتيريك كوپەن امىربەك قازاق ولەڭىنىڭ ۇلتتىق بوياۋى مەن رۋحىن ۇستانىپ، ونى بايىتا تۇسكەن اقيىق اقىننىڭ 80 جاسقا تولعان مەرەيتويى تۋعان جەرى - وتىراردان باستاۋ الۋى ۇلكەن قۇرمەت ەكەندىگىن ايتىپ ءوتتى. ال، مۋزەي ديرەكتورى جانگەلدى ماحاشوۆ ەلىمىزدىڭ تاۋەلسىزدىگى مەن انا ءتىلىنىڭ مارتەبەسى ءۇشىن اقىننىڭ قوسقان ەڭبەگى وراسان زور ەكەندىگىن جەتكىزدى. مەرەيتويعا ارنالعان مادەني شارا بۇدان ءارى اۋداندىق مادەنيەت سارايىندا جالعاسىن تاپتى. اقىنعا اۋدان تۇرعىندارى اقبوز ات مىنگىزىپ، قۇرمەت كورسەتتى. ءسانى مەن سالتاناتى جاراسقان ساحنادا «التىن دومبىرا» يەگەرى، بەلگىلى ايتىسكەر بەكارىس شويبەكوۆ ارناۋ ايتتى.

جيىنعا قۋانىش ايتاحانوۆ، قۇلبەك ەرگوبەك، كوپەن امىربەك، جەڭىسبەك ماۋلەنقۇلوۆ، قازىبەك يسا، ءالىمجان قۇرتايەۆ، سەرىكجان سەيىتجانوۆ، ءحانبيبى ەسەنعارا قىزى، قاليما جانتورەيەۆا، بەكجىگىت سەردالى سىندى ەل ازاماتتارى قاتىستى. ق ر ءماجىلىس ءتوراعاسىنان، قىزىلوردا وبلىسى اكىمىنەن جانە ەلىمىزدىڭ ءار ايماعىنان كەلگەن جەدەل قۇتتىقتاۋلار وقىلىپ، اقىنعا سىي-سىياپات جاسالدى. تۇركىستان وبلىستىق مادەنيەت باسقارماسى باسشىسىنىڭ ورىنباسارى اسىلحان تەمىرحان وبلىس اكىمىنىڭ قۇتتىقتاۋ حاتى مەن سىي-سياپاتىن جەتكىزسە، وبلىستىق ءماسليحات حاتشىسى قايرات بالابيەۆ تە قالامگەرگە دەگەن لەبىزىن ءبىلدىردى. مەرەيتوي حاديشا شالابايەۆا باستاعان انشىلەردىڭ قاتىسۋىمەن وتكەن كونسەرتكە ۇلاستى.

اۆتور: قايرات زاينيشەۆ