قازاقستاندا «قازاق انيماتسيا» شىعارماشىلىق بىرلەستىگى قۇرىلادى
بۇل تۋرالى ءوزىنىڭ Facebook پاراقشاسىندا ق ر مادەنيەت جانە سپورت ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات.
«بۇگىن شاكەن ايمانوۆ اتىنداعى «قازاق فيلم» اكسيونەرلىك قوعامى جانىنان «قازاق انيماتسيا» شىعارماشىلىق بىرلەستىگىن قۇرۋ بويىنشا جيىن وتكىزدىم. وزدەرىڭىزگە بەلگىلى، جاس ۇرپاق تاربيەسى انيماتسيامەن تىعىز بايلانىستى. قازىرگى تاڭدا بۇلدىرشىندەرىمىز باتىستان ۇزدىكسىز كەلىپ جاتقان شەتەلدىك ونىمدەردى قاراپ، تىلىمىزگە دە، دىلىمىزگە دە قايشى مۋلتفيلمدەردى كوپتەپ كورىپ جاتقانى جاسىرىن ەمەس. سول سەبەپتى دە ءبىز ءوزىمىزدىڭ ۇلتتىق قۇندىلىقتارىمىزعا نەگىزدەلگەن وتاندىق ونىمدەرىمىزدىڭ ءورىسىن كەڭەيتۋدى قولعا الىپ وتىرمىز. مادەنيەت جانە سپورت مينيسترلىگىنىڭ تىكەلەي باستاماسىمەن «قازاق انيماتسيا» بىرلەستىگىنىڭ جۇمىسىن ىسكە قوسۋ - ەڭ الدىمەن ۇلتتىق انيماتسيانى قولداۋدىڭ جاڭا جۇيەسىن قالىپتاستىرادى. ارينە، اۋقىمدى جۇمىستى بىردەن جولعا قويۋ وڭاي ەمەس»، - دەيدى مينيستر.
ونىڭ سوزىنشە، بۇل باعىتتا ءبىرىنشى كەزەكتە انيماتسيالىق پيلوتتىق جوبالاردىڭ ستسەناريلەرىنە بايقاۋ ۇيىمداستىرىلدى. ۇسىنىلعان جوبالاردى ىرىكتەيتىن ساراپتامالىق كەڭەس قۇرىلماق. سونداي- اق جيىندا وتاندىق انيماتسيا ماماندارىنىڭ شەتەلدىك كومپانيالاردا تاعىلىمدامادان ءوتۋى جايلى ماسەلە جان- جاقتى سارالاندى. بۇگىندە الەمنىڭ بىرنەشە جەتەكشى انيماتسيالىق ستۋدياسىنان شەتەلدىك مامان تارتۋ ارقىلى، جىل سوڭىنا دەيىن العاشقى 10 پيلوتتىق جوبانى كورەرمەنگە ۇسىنۋ كوزدەلىپ وتىر.
«ءبىز وسى جۇمىستار ارقىلى ۇلتتىق انيماتسيانىڭ باسەكەگە قابىلەتتىلىگىن ارتتىرىپ، ول ونىمدەردى ۇلكەن پروكاتقا شىعارۋدى جوسپارلايمىز. زامان كوشىنەن قالماي، ءبىلىمدى دە بىلىكتى شىعارماشىل جاستارىمىزدى قولداپ، جاڭا يدەيالار مەن تىڭ باستامالارعا ىڭعايلى الاڭ جاساۋىمىز قاجەت. اۋديتوريا سۇرانىسىن قاناعاتتاندىراتىن ساپالى كونتەنت قالىپتاسىرىپ، شەتەلدىك ارىپتەستەرمەن تىعىز بايلانىس نەگىزىندە قازاق انيماتسياسىن حالىقارالىق دارەجەگە كوتەرەمىز دەپ سەنەمىن»، - دەيدى داۋرەن ابايەۆ.
