ديرەكتورمەن بىرگە مەكتەپتىڭ باسقا قىزمەتكەرلەرىنىڭ اۋىسۋىنا توسقاۋىل قويۋ كەرەك - ايماعامبەتوۆ

نۇر-سۇلتان. قازاقپارات - مەكتەپ ديرەكتورلارىن روتاتسيالاعاندا باسقا دا قىزمەتكەرلەردىڭ بىرگە اۋىسۋىنا توسقاۋىل قويۋ كەرەك.

بۇل تۋرالى وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى. «روتاتسيا وتىزگەن كەزدە ديرەكتورمەن قوسا ورىنباسارلارىنىڭ، ەسەپشىسىنىڭ، باسقا قىزمەتكەرلەردىڭ بىرگە اۋىسۋىنا توسقاۋىل قويۋ كەرەك. بۇل جايىندا ايتتىق. باقىلاۋ دەپارتامەنتتەرى ءتيىستى قاداعالاۋعا السىن. بۇل روتاتسيانى ءبارىن ءبىر مەكتەپتەن ەكىنشى مەكتەپكە كوشىپ بارۋى ءۇشىن ىستەپ جاتقان جوقپىز. وسى ماسەلەگە باقىلاۋ جۇرگىزۋ كەرەك. جالپى، زاڭ اياسىندا بارلىق جۇمىس ىسكە اسۋى ءتيىس. كەيبىر وڭىردە «مىنا مەكتەپكە بارعىم كەلەدى، مىناعان بارعىم كەلمەيدى» دەيتىندەردى ەستىپ جاتىرمىن. مۇنى توقتاتۋ كەرەك. ەگەر «روتاتسيانى تۇسىنبەيمىز، قابىلدامايمىز» دەسە، ونداي كىسىلەرمەن ەڭبەكشارتىن ءتىپتى توقتاتۋ قاجەت»، - دەدى مينيستر ۆەدومستۆونىڭ اپپارات جينالىسىندا.

اسحات ايماعامبەتوۆ روتاتسيا وتە ماڭىزدى تەتىك ەكەندىگىن باسا ايتتى.

«ءبىراق، ەكى ماسەلەگە نازار اۋدارۋ قاجەت. بىرىنشىدەن، روتاتسيا جۇرگىزگەن كەزدە ورىنباسارلارىن، ەسەپشىلەرىن وزىمەن بىرگە الىپ جۇرمەۋ، ەكىنشىدەن، وبەكتيۆتى كوزقاراسپەن، زاڭناماعا ساي اۋىستىرۋ قاجەت. بۇل جەردە ءارتۇرلى تاۋەكەلدەرگە جول بەرىلمەۋى ءتيىس. زاڭ بۇزۋشىلىقتار بولسا، دەر كەزىندە شەشىم قابىلداۋىمىز كەرەك»، - دەدى ول. بۇعان دەيىن حابارلاعانىمىزداي، وسى جىلدىڭ 1-تامىزىنا دەيىن 317 بالاباقشا مەڭگەرۋشىسى مەن 383 مەكتەپ ديرەكتورى اۋىسادى.