ەۋرووداق قازاقستاننان شىعارىلعان اكتيۆتەردى قايتارۋعا كومەكتەسۋگە دايىن
بۇل تۋرالى ورتالىق ازيا بويىنشا ارنايى وكىل تەري حاكالا ق ر سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى ولجاس بەكتەنوۆپەن كەزدەسۋىندە ءمالىم ەتتى، دەپ حابارلايدى قازاقپارات انتيكورعا سىلتەمە جاساپ.
«اگەنتتىكتىڭ ەۋروپالىق سەرىكتەستەرمەن ءوزارا ءىس- قيمىل ماسەلەلەرىندە اشىقتىعى مەن دايىندىعىن ەرەكشە اتاپ وتكىم كەلەدى. ءبىز ءوز تاراپىمىزدان قازاقستاننان ەۋروپاعا شىعارىلعان اكتيۆتەردى قايتارۋ تۋرالى سۇرانىستارعا قولداۋ كورسەتۋگە دايىنبىز»، - دەپ اتاپ ءوتتى تەري حاكالا.
ق ر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ولجاس بەكتەنوۆتىڭ ورتالىق ازيا بويىنشا ارنايى وكىل تەري حاكالا باستاعان ەۋرووداق دەلەگاتسياسىمەن كەزدەسۋى بارىسىندا انتيكور باسشىسى 2022-2026 -جىلدارعا ارنالعان سىبايلاس جەمقورلىققا قارسى ساياسات تۇجىرىمداماسىنىڭ نەگىزگى باعىتتارىمەن تانىستىردى.
اتاپ ايتقاندا، تاراپتار زاڭسىز بايۋ ءۇشىن زاڭنامالىق جاۋاپكەرشىلىكتى ەنگىزۋ جانە كىرىستەر مەن شىعىستاردى جالپىعا بىردەي دەكلاراتسيالاۋ ماسەلەلەرىن تالقىلادى. بيزنەستى قورعاۋ ماسەلەلەرى دە تالقىلاندى. ەۋروپالىق ارىپتەستەر ەلدىڭ سىبايلاس جەمقورلىققا قارسى ساياساتىنىڭ ەكپىنىن وڭ باعالاپ، گرەكونىڭ حالىقارالىق سىبايلاس جەمقورلىققا قارسى ستاندارتتارى مەن وزىق تاجىريبەلەرىنە سايكەستىگىنە ۇمتىلىسىن اتاپ ءوتتى. دامۋدىڭ ماڭىزدى ۆەكتورى قازاقستاننىڭ سىبايلاس جەمقورلىق ءۇشىن قىلمىستىق جاۋاپكەرشىلىك تۋرالى ەۋروپا كەڭەسىنىڭ كونۆەنتسياسىنا قوسىلۋعا دايىندىعى اتالىپ ءوتتى. ەستەرىڭىزگە سالا كەتەيىك، ءتيىستى شاقىرۋ اعىمداعى جىلدىڭ 1-شىلدەسىندە كەلىپ ءتۇستى. قاڭتار وقيعاسىنا بايلانىستى ازاپتاۋ تۋرالى مالىمدەمەلەرگە قاتىستى ىستەردى تەرگەۋ ءسوز بولدى.
«قازىرگى ۋاقىتتا 171 ءىس اياقتالدى. 177 ءىس بويىنشا تەرگەۋ جالعاسىپ جاتىر. ستامبۋل حاتتاماسىنىڭ بارلىق تالاپتارى ساقتالىپ وتىر»، - دەدى ولجاس بەكتەنوۆ.
اگەنتتىك باس پروكۋراتۋرانىڭ بايلانىس ارنالارى ارقىلى قىزىعۋشىلىق تانىتقان حالىقارالىق قاۋىمداستىققا اقپارات بەرەدى.
