شىڭعىس حاننىڭ نەمەرەسىنە تيەسىلى كەرۋەن ساراي قالدىعى تابىلدى - فوتو

نۇر-سۇلتان. قازاقپارات – موڭعول جانە تۇرىك ارحەولوگتارى تۇركيانىڭ ۆان ايماعىنان شىڭعىسحان نەمەرەسى حۋلاگۋ حانعا تيەسىلى جازعى سارايدىڭ قالدىقتارىن تاپتى.

بۇل تۋرالى montsame حابارلادى.

موڭعول مەملەكەتتىك ۋنيۆەرسيتەتىنىڭ تاريح فاكۋلتەتىنىڭ عالىمدارى كونە پارسى جانە ارميان دەرەكتەرىنەن ⅩⅢ عاسىردا حۋلاگۋ حاننىڭ جازعى سارايىنىڭ ورنالاسقان جەرى تۋرالى مالىمەتتەردى تاپتى. بۇل مالىمەتتەردى ۆان تاريحي مۇراجايىنىڭ زاتتارىمەن سالىستىرا وتىرىپ، عالىمدار سارايدىڭ قاي جەردە ورنالاسقانىن انىقتاي الدى.

قازبا جۇمىستارى ناتيجەسىندە كەرۋەن ساراي مەن ساز پەشتىڭ قالدىقتارى، سونداي-اق حان سارايىن ەسكە تۇسىرەتىن قابىرعا قالدىقتارى تابىلدى.

حۋلاگۋحان (1217-1265 ج ج. ءومىر سۇرگەن) ءوز زامانىنداعى ەڭ دارىندى موڭعول قولباسشىلارىنىڭ ءبىرى. ول يراننىڭ نيزاريلەرىنە، باعدادتاعى ابباسيد حاليفاتىنا جانە مىسىر مەن باتىس ازيانى بيلەگەن ايۋبيلەر سۇلتاندىعىنا قارسى موڭعولدار جورىعىن باسقاردى. ناتيجەسىندە بۇل مەملەكەتتەر ىدىراپ، ورنىنا حۋلاگۋ مەملەكەتى قۇرىلدى. سول كەزدەگى پارسى تاريحشىلارى حۋلاگۋ حاننىڭ اسكەرى 70 مىڭ ادام بولعانىن جازعان.

وسى ۋاقىتقا دەيىن الەمدە ءتورت موڭعول سارايىنىڭ قالدىقتارى تابىلدى. ولار: ىشكى موڭعولداعى (ق ح ر) قۇبىلاي حاننىڭ سارايى، يرانداعى امباعاي حاننىڭ جازعى سارايى جانە استراحان وبلىسىنداعى التىن وردانىڭ استاناسى «ەسكى ساراي» دەپ اتالاتىن باتۋحان سارايى.

massaget.kz