ءتۇن ورتاسىندا توبەلەسكەن ەكى جىگىتتىڭ ءىسى سوتقا جولداندى

اتىراۋ. قازاقپارات - اتىراۋدا ءتۇن ورتاسىندا تۇرعىن ءۇيدىڭ اۋلاسىندا ەكى جىگىتتىڭ توبەلەسكەنى بەينەباقىلاۋ كامەراسىنا ءتۇسىپ قالعان.

پوليتسيا قىزمەتكەرلەرى ماس كۇيدە جانجالداسقان سوتقارلاردى انىقتاپ، ءىس- قۇجاتتارىن سوتقا جولدادى، دەپ حابارلايدى قازاقپارات. وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 10-شىلدەدە ساعات 03:57 شاماسىندا ەكى جىگىتتىڭ توبەلەسكەنى بەينەباقىلاۋ كامەراسىنا ءتۇسىپ قالعان.

«اتىراۋ قالاسىنداعى «الماگۇل» شاعىناۋدانىندا ورنالاسقان ۇيلەردىڭ ءبىرىنىڭ اۋلاسىندا ەكى ەر ادام توبەلەس شىعارعان. اتىراۋ قالالىق پوليتسيا باسقارماسىنىڭ جەدەل باسقارۋ ورتالىعىنىڭ قىزمەتكەرلەرى جانجالداسقان جىگىتتەردى بەينەباقىلاۋ ارقىلى بايقاپ قالعان. سودان كەيىن پاترۋلدىك پوليتسيا قىزمەتكەرلەرىنە ءتيىستى مالىمەتتەر بەرگەن»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

پاترۋلدىك پوليتسيا قىزمەتكەرلەرى وقيعا ورنىنا جەدەل جەتىپ، ەكى ەر ادامدى ۇستادى. ونىڭ ءبىرى - باتىس قازاقستان وبلىسىنداعى ورال قالاسىنىڭ، ەكىنشىسى اتىراۋ وبلىسىنىڭ ماحامبەت اۋدانىنىڭ تۇرعىنى ەكەنى انىقتالدى.

الكوگولدىك ىشىمدىك ىشكەن ەكى جىگىت ءبىر- بىرىمەن جانجالداسىپ، سوڭى توبەلەسكە ۇلاسقان. سول سەبەپتەن، ءتارتىپ ساقشىلارى ولاردى مەديتسينالىق ساراپتامادان وتكىزۋگە شەشىم قابىلداعان. مەديتسينالىق ساراپتامانىڭ قورىتىندىسىمەن توبەلەسقۇمارلاردىڭ ورتا دارەجەلى ماس كۇيدە ەكەنى بەلگىلى بولدى.

قازىر ءتۇن ورتاسىندا قوعامدىق ورىندا توبەلەسكەن 41 جانە 30 جاستاعى ەكى ازاماتقا قاتىستى ق ر اكىمشىلىك قۇقىقبۇزۋشىلىق تۋرالى كودەكسىنىڭ 434-بابىنىڭ 1-بولىگىمەن (ۇساق بۇزاقىلىق) اكىمشىلىك حاتتاما تولتىرىلدى.

ال، جيناقتالعان ءىس- قۇجاتتار شەشىم قابىلداۋ ءۇشىن اكىمشىلىك سوتقا جولداندى. ەندى ولار سوت شەشىمىمەن بەس ايلىق ەسەپتىك كورسەتكىش كولەمىندە ايىپپۇل تولەۋى نەمەسە ون تاۋلىككە اكىمشىلىك قاماۋعا الىنۋى مۇمكىن.