15:47, 11 - شىلدە 2022 | GMT +5
وسكەمەندە ارزان باعاعا قانت ساتاتىن الاياقتار پايدا بولدى
وسكەمەن. قازاقپارات -وسكەمەن قالاسىنىڭ تۇرعىندارىن قانتتى ارزانعا ساتاتىندىقتارىن ايتىپ الدايتىن الاياقتار پايدا بولدى، دەپ حابارلايدى قازاقپارات ءتىلشىسى.
«ەرتىس» الەۋمەتتىك- كاسىپكەرلىك كورپوراتسياسىنىڭ مالىمەتىنشە، سوڭعى ۋاقىتتا وسكەمەندە كورپوراتسيا اتىن جامىلعان بەلگىسىز بىرەۋلەر تۇرعىندارعا قانتتى ارزان باعامەن ساتىپ الۋدى ۇسىنىپ قوڭىراۋ شالىپ نەمەسە حابارلاما جىبەرىپ جاتىر. ولار ازاماتتارعا قانتتى ساتىپ الۋ ءۇشىن ءتيىستى سومانى بانك كارتاسىنا اۋدارۋدى سۇرايدى.
«كومپانيا قىزمەتكەرلەرى مۇنداي زاڭسىز ارەكەتتەرگە بارمايدى. سوندىقتان ازاماتتارعا اركەز اباي بولۋدى جانە وسىنداي قوڭىراۋلار نەمەسە حابارلامالار تۇسكەن جاعدايدا بىردەن قۇقىق قورعاۋ ورگاندارىنا جۇگىنۋدى سۇرايمىز»، - دەلىنگەن اقپاراتتا.
كومپانيا دەرەگىنشە، الەۋمەتتىك ماڭىزى بار ونىمدەر، ونىڭ ىشىندە قانت قاتاڭ تۇردە تۇراقتاندىرۋ قورىنىڭ پاۆيلوندارىندا جانە «ەرتىس» ا ك ك ا ق- مەن سەرىكتەس دۇكەندەردە ساتىلادى.
