كەدەندىك تەكسەرۋ قالاي جۇرگىزىلەدى

كەدەندىك تەكسەرۋ تۇلعالاردىڭ كەدەن زاڭناماسىن ساقتاۋىن تەكسەرۋ ماقساتىندا تاۋارلاردى شىعارعاننان كەيىن كەدەن ورگانىمەن جۇرگىزىلەدى. كەدەندىك تەكسەرۋ جۇرگىزۋ ءتارتىبى ەۋرازيالىق ەكونوميكالىق وداق كەدەن كودەكسىنىڭ 45-تاراۋىمەن جانە «قازاقستان رەسپۋبليكاسىنداعى كەدەندىك رەتتەۋ تۋرالى» قازاقستان رەسپۋبليكاسى كودەكسىنىڭ 47-تاراۋىمەن رەگلامەنتتەلگەن. كەدەندىك تەكسەرۋ دەكلارانتقا، تاسىمالداۋشىعا، ۋاقىتشا ساقتاۋ قويماسى بولىپ تابىلمايتىن ورىنداردا تاۋارلاردى ۋاقىتشا ساقتاۋدى جۇزەگە اسىراتىن نەمەسە تاۋارلار شىعارىلعاننان كەيىن ولارعا قاتىستى وكىلەتتىكتەرى بار تۇلعالارعا، ۋاكىلەتتى ەكونوميكالىق وپەراتورعا، كەدەندىك راسىممەن ورنالاستىرىلعان تاۋارلارمەن جاسالعان مامىلەلەرگە تىكەلەي نەمەسە جاناما تۇردە قاتىسقان تۇلعاعا جانە باسقا دا قاتىسى بار تۇلعالارعا قاتىستى جۇرگىزىلەدى.

كەدەندىك تەكسەرۋ كەزىندە نە تەكسەرىلەدى؟

كەدەندىك تەكسەرۋدى جۇرگىزۋ كەزىندە:

- تاۋارلاردى كەدەندىك راسىممەن ورنالاستىرۋ فاكتىسى؛

- كەدەندىك دەكلاراتسيادا مالىمدەلگەن جانە قۇجاتتارداعى مالىمەتتەردىڭ انىقتىعى؛

- شارتتى تۇردە شىعارىلعان تاۋارلاردى پايدالانۋ نەمەسە ولارعا بيلىك ەتۋ بويىنشا شەكتەۋلەردىڭ ساقتالۋى؛

- كەدەن ءىسى سالاسىنداعى قىزمەتتى جۇزەگە اسىراتىن تۇلعالاردىڭ كەدەن زاڭناماسىندا كوزدەلگەن مىندەتتەردى ورىنداۋى؛

- ۋاكىلەتتى ەكونوميكالىق وپەراتورلاردىڭ تىزىلىمىنە ەنگىزىلۋگە ۇمىتكەر زاڭدى تۇلعانىڭ وسىنداي تىزىلىمگە ەنگىزۋ شارتتارىن ساقتاۋىن جانە كەدەن زاڭناماسىندا كوزدەلگەن وزگە مىندەتتەردى ورىنداۋى؛

- كەدەن زاڭناماسىندا كوزدەلگەن كەدەندىك راسىمدەرگە سايكەس تاۋارلاردى پايدالانۋ شارتتارىنىڭ ساقتالۋى تەكسەرىلۋى مۇمكىن. كەدەندىك تەكسەرۋ تۇرلەرى كەدەندىك تەكسەرۋ كامەرالدىق نەمەسە كوشپەلى بولۋى مۇمكىن. كامەرالدىق كەدەندىك تەكسەرۋدى كەدەن ورگانىنىڭ ورنالاسقان جەرى بويىنشا كەدەن ورگاندارى تەكسەرىلەتىن تۇلعاعا بارماي، سونداي-اق كامەرالدىق كەدەندىك تەكسەرۋدى جۇرگىزۋ تۋرالى شەشىمىن (نۇسقاماسىن) رەسىمدەمەي جۇرگىزەدى. كامەرالدىق كەدەندىك تەكسەرۋدى جۇرگىزۋدىڭ باستالعانى تۋرالى (ق ر ق م 24.06.2019 ج. №621 بۇيرىعى) تەكسەرىلەتىن تۇلعا حاباردار ەتىلەدى. كوشپەلى كەدەندىك تەكسەرۋلەردىڭ 3 ءتۇرى بار:

1) جوسپاردان تىس؛

2) جوسپاردان تىس قارسى؛

3) كەشەندى.

كەدەندىك تەكسەرۋلەر قالاي جۇرگىزىلەدى؟

كوشپەلى كەدەندىك تەكسەرۋدى كەدەن ورگانى زاڭدى تۇلعانىڭ ورنالاسقان جەرىنە، دارا كاسىپكەردىڭ قىزمەتىن جۇزەگە اسىراتىن ورىنعا نەمەسە وسىنداي تۇلعالاردىڭ قىزمەتتى ءىس جۇزىندە جۇزەگە اسىراتىن ورنىنا بارىپ جۇرگىزەدى. بۇل تەكسەرۋدى تەكسەرىلەتىن تۇلعانىڭ ورنالاسقان جەرى بويىنشا كەدەن ورگانى جۇزەگە اسىرادى. كوشپەلى كەدەندىك تەكسەرۋ نۇسقاما نەگىزىندە جۇرگىزىلەدى (ق ر ق م 08.02.2018ج. №146 بۇيرىعى).

تەكسەرۋ مەرزىمى

كامەرالدىق كەدەندىك تەكسەرۋدى جۇرگىزۋ مەرزىمى تەكسەرىلەتىن تۇلعاعا كامەرالدىق كەدەندىك تەكسەرۋدى جۇرگىزۋدىڭ باستالعانى تۋرالى حابارلاما جىبەرىلگەن كۇننەن باستاپ كۇنتىزبەلىك الپىس كۇننەن اسپاۋعا ءتيىس. كوشپەلى كەدەندىك تەكسەرۋدى جۇرگىزۋ مەرزىمى ەكى ايدان اسپاۋعا ءتيىس.

كەدەندىك تەكسەرۋدى اياقتاۋ ءتارتىبى

كەدەندىك تەكسەرۋ اكتىسى جاسالعانعا دەيىن، بۇزۋشىلىقتار انىقتالعان جاعدايدا، كەدەن ورگانىنىڭ لاۋازىمدى ادامى تەكسەرىلەتىن تۇلعاعا كەدەندىك تەكسەرۋدىڭ الدىن الا اكتىسىن تابىستايدى. بۇل رەتتە تەكسەرىلەتىن تۇلعا كەدەندىك تەكسەرۋدىڭ الدىن الا اكتىسىنە جازباشا قارسىلىق بەرۋگە قۇقىلى (ق ر ق م 21.04.2021ج. جانە №376 جانە 29.04.2021ج. №413 بۇيرىقتارى).

كەدەندىك تەكسەرۋ ناتيجەلەرى بويىنشا رەسىمدەلگەن، تەكسەرىلەتىن تۇلعاعا تابىس ەتىلەتىن كەدەندىك تەكسەرۋ اكتىسى جاسالعان كۇن كەدەندىك تەكسەرۋدىڭ اياقتالعان كۇنى بولىپ ەسەپتەلەدى. كەدەن زاڭناماسىن بۇزۋشىلىقتار انىقتالعان جاعدايدا تەكسەرۋ ناتيجەلەرى تۋرالى حابارلاما شىعارىلادى.

وسىنداي حابارلامانى ورىنداۋ مەرزىمى تەكسەرىلەتىن تۇلعاعا وسىنداي حابارلاما تابىس ەتىلگەن كۇننەن كەيىنگى كۇننەن باستاپ وتىز جۇمىس كۇنىنەن اسپايدى. تەكسەرىلەتىن تۇلعا وسىنداي حابارلامانى العان كۇننەن كەيىنگى كۇننەن باستاپ وتىز جۇمىس كۇنى ىشىندە شاعىمدانۋعا قۇقىلى. كەدەن ورگاندارىنىڭ ارەكەتىنە (ارەكەتسىزدىگىنە) شاعىمدانۋ ءتارتىبى قازاقستان رەسپۋبليكاسىنىڭ اكىمشىلىك راسىمدىك- پروتسەستىك كودەكسىنىڭ 13-تاراۋىمەن كوزدەلگەن.