ەلوردادا اۆتوكولىك ۇرلاعان كۇدىكتىلەر قولعا ءتۇستى
نۇر- سۇلتان. قازاقپارات - نۇر- سۇلتان قالاسىنىڭ پوليتسەيلەرى جەدەل- ىزدەستىرۋ ءىس- شارالارىن جۇرگىزۋ بارىسىندا اۆتوكولىك ۇرلاعان 19 جانە 20 جاستاعى ەكى كۇدىكتىنى ۇستادى، دەپ حابارلايدى قازاقپارات.
پوليتسياعا ەلورداداعى كيم كوشەسى بويىنداعى ۇيلەردىڭ ءبىرىنىڭ اۋلاسىنان «ۆاز 2110» ماركالى اۆتوكولىگىن بەلگىسىز بىرەۋلەردىڭ جاسىرىن ۇرلاپ اكەتكەنى تۋرالى حابارلاما كەلىپ تۇسكەن.
«تەرگەۋ بارىسىندا ۇستالعان كۇدىكتىلەر تۇنگى ۋاقىتتا ءۇيدىڭ اۋلاسىندا ەسىگى اشىق قالعان اۆتوكولىكتى بايقاپ، ونى ۇرلاپ اكەتۋ ءۇشىن سالونىنا كىرگەنى انىقتالدى. كولىكتىڭ كىلتى جوق بولعاندىقتان، قاسكۇنەمدەر باستاپقىدا ونى يتەرىپ جولعا الىپ شىعادى، كەيىن ينتەرنەتتەن قاراپ كولىكتى كىلتسىز وتالدىرىپ، ايداپ اكەتەدى. ۇرلانعان كولىكپەن كۇدىكتىلەر قوستاناي وبلىسىنا دەيىن بارىپ، سول جەردە قۇجاتتارىنسىز ارزان باعاعا ساتىپ جىبەرەدى. كەلتىرىلگەن شىعىن سوماسى 500 مىڭ تەڭگەنى قۇرادى»، - دەپ جازدى قالالىق پوليتسيا دەپارتامەنتىنەن.
اتالعان فاكتى بويىنشا «ۇرلىق» بابىنا سايكەس سوتقا دەيىنگى تەرگەۋ امالدارى جۇرگىزىلۋدە. ۇستالعان ەر ادامدار ءوز كىنالارىن مويىندادى، اۆتوكولىك يەسىنە قايتارىلدى. ولاردىڭ ەلوردا اۋماعىندا بۇرىن جاسالعان وسىعان ۇقساس قىلمىستارعا قاتىسى بار- جوعى تەكسەرىلۋدە.
