ەلوردا اكىمى تۇرعىنداردىڭ اقىلى تۇراقتارعا قاتىستى شاعىمىن قاراۋعا ۋادە بەردى
«اقىلى تۇراقتار - بۇل دا ءىرى قالالار ءۇشىن جاڭا جوبا. حالىقارالىق تاجىريبەدە اقىلى تۇراقتار ءتارتىپسىز قوزعالىستى نەمەسە ءتارتىپسىز تۇراقتاردى رەتتەۋ ءۇشىن قولدانىلادى. جوبا مينيسترلىكتەر ءۇيى ورنالاسقان ماڭگىلىك ەل داڭعىلىندا جاقسى قىرىنان كورىندى. كەزىندە اۆتوكولىك قوياتىن جەر بولماي، شاعىم كوپ تۇسەتىن ەدى. ودان كەيىن، اسىرەسە قىس ۋاقىتىندا كولىكتەر قالانىڭ قارىن تازالاۋعا دا كەدەرگى كەلتىرەتىن»، - دەدى التاي كولگىنوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا ب ا ق وكىلدەرىنىڭ ساۋالىنا وراي.
ونىڭ اتاپ وتۋىنشە، اقىلى تۇراقتارعا قاتىستى مەملەكەتتىك-جەكەشەلىك ارىپتەستىك كەلىسىمشارتىنا 2019-جىلى قول قويىلعان.
«ءبىز ونى قايتادان قارادىق. ەستەرىڭىزدە بولسا، ءتىپتى الەۋمەتتىك تۇرعىن ۇيلەردىڭ جانىنا اقىلى تۇراقتار ورناتا باستاعان سوڭ تۇرعىنداردان شاعىمنىڭ كوپ تۇسكەنىن ەسكەرە وتىرىپ، سوتتاسقان دا ەدىك. وعان تۇبەگەيلى قارسى (تۇرعىن ۇيلەردىڭ جانىنا اقىلى تۇراق ورناتۋعا) بولدىق جانە ونى قايتا قارادىق. بۇل جاڭا جوبا ەكەنىن ەسكەرسەك، ونى جەتىلدىرۋ ءۇشىن ءالى دە جۇمىس ىستەۋگە دايىنبىز. ەڭ باستىسى، ءتارتىپتىڭ بولۋى جانە تۇرعىنداردىڭ مۇددەسىنە قايشى كەلمەۋى ءتيىس. ءبىز بارلىق شاعىمدى قاراۋعا دايىنبىز. ەگەر اقىلى تۇراقتار ءبىر جەردە زاڭسىز ورناتىلسا، وندا ونى الىپ تاستايمىز»، - دەدى ەلوردا باسشىسى.
