انتيكوردا بيزنەسمەندەردى سەبەپسىز مازالاۋ تىيىلا باستادى
سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى ولجاس بەكتەنوۆ ۆەدومستۆونىڭ القا وتىرىسىندا وسىلاي دەپ ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسى بويىنشا بيزنەستىڭ ىسىنە زاڭسىز كيلىگۋدەن، ونىڭ ىشىندە ءبىزدىڭ جاۋاپسىز قىزمەتكەرلەردەن دە قورعايتىن تەتىكتەر ەنگىزىلىپ جاتىر. كاسىپكەرلەرگە قاتىسى بار ىستەردى تەرگەۋدىڭ الگوريتمى ازىرلەندى. مۇندا سوتقا دەيىنگى تەرگەۋ ىستەرىنىڭ ءبىرىڭعاي تىزبەسىن تىركەۋدەن باستاپ، جاۋاپ الۋ جانە ءتىنتۋ جۇرگىزۋ ءتارتىبى تۇگەل قايتا رەگلامەنتتەلەدى»، - دەدى ولجاس بەكتەنوۆ.
انتيكور باسشىسى كاسىپكەرلەردىڭ ۇستىنەن جەمقورلىق جونىندە تۇسەتىن ارىز- شاعىمدار مۇقيات سۇزگىدەن وتەتىنىن اتادى.
«ءبىز كاسىپكەرلەردىڭ ۇستىنەن ءىس قوزعاۋ تۋرالى باستامالاردىڭ 15 پايىزىنان باس تارتتىق. ويتكەنى وعان نەگىز بولعان جوق. كاسىپكەرلەردى ۆەدومستۆو عيماراتىنا نەگىزسىز شاقىرتۋدىڭ كەز كەلگەن دەرەگى ونلاين مونيتورينگ ارقىلى قاشىقتان باقىلانادى. سونىڭ ارقاسىندا انتيكور عيماراتىنا شاقىرىلاتىن كاسىپكەرلەردىڭ سانى 2 ەسە ازايدى. سونىمەن قاتار، اگەنتتىك جانىنان «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىساتىن ارنايى جۇمىس توبى قۇرىلدى. ونىڭ نەگىزگى مىندەتى - اقپاراتتى جەدەل الماسىپ، وزگە مەملەكەتتىك ورگانداردىڭ ارەكەتى تۋرالى بيزنەستىڭ شاعىمدارىن بىرلەسىپ قاراۋ»، - دەدى اگەنتتىك باسشىسى.
اۆتور: ەسىمجان ناقتىباي
