ەلوردا تۇرعىندارى «قازاقستان» سپورت سارايى قۇرىلىسىنىڭ باياۋ ءجۇرىپ جاتقانىنا نارازى
بۇل تۋرالى نۇر-سۇلتان قالالىق ءماسليحاتىنىڭ دەپۋتاتى المات ءجۇنىسوۆ ايتتى، دەپ حابارلايدى قازاقپارات ءتىلشىسى.
«ءماسليحات دەپۋتاتتارى مەملەكەت پەن جەكە سەرىكتەس اراسىنداعى مەملەكەتتىك-جەكەشەلىك ارىپتەستەستىك كەلىسىمشارتتارىن قايتا قاراۋ مۇمكىندىگىنە قاتىستى ماسەلە كوتەرگەن ەدى. وسى جىلدىڭ ماۋسىمىندا ءماسليحات «قازاقستان» سپورت سارايىن زياتكەرلىك تەحنولوگيالاردى پايدالانا وتىرىپ جاڭعىرتۋ جانە ودان ارى پايدالانۋ بويىنشا مەملەكەتتىك-جەكەشەلىك سەرىكتەستىك جوباسىن قارادى»، - دەدى المات ءجۇنىسوۆ قالالىق ءماسليحات وتىرىسىندا.
ونىڭ پايىمىنشا، جوبا وتە باياۋ جۇرگىزىلىپ جاتىر. قۇرىلىس مەرزىمىنە قاتىستى دا سۇراقتار بار.
«جوبالىق-سمەتالىق قۇجاتتاماعا ساراپتاما جۇرگىزىلگەن. دەگەنمەن، تۇرعىندار تاراپىنان سۇراق كوپ. قالا تۇرعىندارى «قازاقستان» سپورت كەشەنى بىرنەشە جىل بويى قانداي سەبەپتەرمەن جۇمىس ىستەمەي تۇرعانىن بىلگىلەرى كەلەدى»، - دەدى دەپۋتات.
بۇعان دەيىن نۇر-سۇلتان قالاسى اكىمىنىڭ ورىنباسارى ەسەت بايكەن ەلورداداعى «قازاقستان» سپورت كەشەنىن جوندەۋ جۇمىستارى تاياۋدا باستالاتىندىعىن ايتقان ەدى.