تۇرعىن ءۇيدى جالعا بەرۋ بويىنشا قانشا ءوتىنىم ماقۇلداندى
بۇل تۋرالى قوستاناي وبلىسىنا جاساعان جۇمىس ساپارى بارىسىندا يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلبايەۆ مالىمدەدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
«سوڭعى 6 ايداعى ورتاشا جيىنتىق تابىسى وتباسىنىڭ ءاربىر مۇشەسىنە شاققاندا ەڭ تومەنگى كۇنكورىس دەڭگەيىنەن اسپايتىن جانە باسپانا كەزەگىندە تۇرعان ازاماتتارعا جەكە تۇرعىن ءۇي قورىنان جالعا بەرۋ مەحانيزمى ەنگىزىلدى. 2022-جىلعى 18- ساۋىردەن باستاپ سيفرلىق پلاتفورما ارقىلى ءوتىنىم قابىلداۋ باستالعانى بەلگىلى. كۇنى بۇگىنگە دەيىن كەلىپ تۇسكەن 23 مىڭعا جۋىق ءوتىنىمنىڭ 5768 ءى ماقۇلداندى»، - دەدى ەركەبۇلان داۋىلبايەۆ.
سونىمەن قاتار، ۆيتسە-مينيستر مەملەكەتتىك قولداۋعا ءتورت سانات بويىنشا باسپانا كەزەگىندە تۇرعان قازاقستاندىقتار ءوتىنىش بەرە الاتىندىعىن اتاپ ءوتتى.
ولاردىڭ قاتارىنا 1 جانە Ⅱ توپتاعى مۇگەدەكتەر، مۇمكىندىگى شەكتەۋلى بالالارى بار نەمەسە ولاردى تاربيەلەپ وتىرعان وتباسىلار، جەتىم جانە اتا-اناسىنىڭ قامقورلىعىنان ايىرىلعان بالالار مەن كوپبالالى وتباسىلار كىرەدى.
ايتا كەتسەك، بيىل قوستاناي وبلىسى بويىنشا كەزەكتە تۇرعان 1193 ازامات جالداۋ تولەمدەرى بويىنشا مەملەكەتتىك قولداۋ الادى دەپ جوسپارلانعان.