الماتىلىق دارىگەرلەر باس سۇيەكتى يمپلانتتىڭ كومەگىمەن قالپىنا كەلتىردى
دەنساۋلىق ساقتاۋ مەكەمەسىنىڭ مالىمەتىنشە، دارىگەرلەر وعان تيتاننان جاسالعان 3D پلاستينا ورناتقان. كۇردەلى وپەراتسيا مىندەتتى الەۋمەتتىك مەديتسينالىق ساقتاندىرۋ شەڭبەرىندە جاسالدى. حابارلاماعا سۇيەنسەك، جاس جىگىتكە وسىمەن ەكىنشى رەت وتا جاسالىپ وتىر. بۇعان دەيىن پاتسيەنت جوعارىدان قۇلاپ، اۋىر باس-مي جاراقاتىن العان. العاشىندا ماماندار سۇيەكتى تەسىپ، ترەپاناتسيا جاساپ، پروتەز ورناتقان.
«پلاستيكالىق وپەراتسيادان كەيىن ناۋقاس تاعى قۇلاپ، ورناتىلعان پروتەزدى سىندىرىپ العان. ارىپتەستەرمەن اقىلداسا كەلە، ءبىر مەزەتتە سىنعان اكريل پروتەزدى الىپ تاستاپ، تيتاننان جاسالعان 3D پلاستينا ورناتۋ تۋرالى شەشىم قابىلدادىق»، - دەيدى №2-نەيروحيرۋرگيا بولىمشەسى مەڭگەرۋشىسى يلدار قۇرمايەۆ.
ماماننىڭ ايتۋىنشا، كرانيوپلاستيكا دەپ اتالاتىن وتا ادەتتە، باستاعى ۇيىعان قاندى، ىسىكتى العاننان كەيىن، باس سۇيەكتىڭ سىنعان بولىكتەرىن الىپ تاستاعاننان سوڭ جاسالادى.
ول ميدىڭ قايتا زاقىمدانۋىنا جول بەرمەي، جاراقاتتان كەيىن بولاتىن اسقىنۋلاردىڭ الدىن الادى. پاتسيەنتتەر وپەراتسيادان كەيىن جەتىنشى كۇنى اۋرۋحانادان شىعادى، وتانىڭ ورنى 10-12 كۇننەن سوڭ جازىلادى.
«ءبىزدىڭ بولىمشەدە جىل سايىن باس- مي جاراقاتىن العان 1 مىڭعا جۋىق پاتسيەنت ەمدەلەدى. ءبىر جىلدا باس سۇيەك دەفەكتىلەرىن جابۋ بويىنشا 100 گە جۋىق وپەراتسيا جاسالادى. ولاردىڭ اراسىندا الماتىنىڭ عانا ەمەس، ەلىمىزدىڭ ءتۇرلى وڭىرلەرىنەن كەلگەن تۇرعىندار دا بار. اكريلدى تسەمەنت پروتەزدەردىڭ، تيتان تورشالار مەن پلاستينالاردىڭ ۇلگىسىن قولمەن جانە 3D كومپيۋتەرمەن مودەلدەۋ تاسىلدەرى قولدانىلادى»، - دەيدى يلدار قۇرمايەۆ.
اۆتور: الما مۇقانوۆا
