پايدالانىلمايتىن اڭشىلىق القاپتاردى مەملەكەتكە قايتارۋدى رەتتەۋ كەرەك - سەنات

None
نۇر- سۇلتان. قازاقپارات - سەناتتىڭ جالپى وتىرىسىندا دەپۋتات جانبولات جورگەنبايەۆ الماتى جانە جەتىسۋ وبلىستارىنداعى جەردىڭ ءتيىمدى يگەرىلمەۋى مەن جايىلىم تاپشىلىعى ماسەلەسىن كوتەردى، دەپ حابارلايدى قازاقپارات ءتىلشىسى.

سەناتوردىڭ كەلتىرگەن دەرەكتەرىنە قاراعاندا، اتالعان وڭىرلەردە جايىلىمداردىڭ باسىم بولىگى اڭشىلىق شارۋاشىلىقتارعا بەرىلىپ كەتكەن. اتالعان ايماقتاردىڭ اۋماعىندا 132 اڭشىلىق القاپ بار، ولاردىڭ جەرىنىڭ جالپى كولەمى 5 ميلليون گەكتاردى قۇرايدى. سونىمەن قاتار، وڭىردە جايىلىمدىق جەرلەردىڭ تاپشىلىعى دا بايقالىپ وتىر. ءدال وسى كەزدە مالشىلاردىڭ ءوز مالدارىن جاياتىن جەرى جوق.

«قولدانىستاعى زاڭدارعا سايكەس، اڭشىلىق القاپتار 10-49 جىلعا دەيىن اڭشىلىق شارۋاشىلىقتارعا ۋاقىتشا جەر پايدالانۋ قۇقىعىمەن بەرىلەدى. بۇل رەتتە، وسىنداي القاپتاردى پايدالانباعانى ءۇشىن مەملەكەتكە قايتارىپ الۋ مۇمكىن بولماي وتىر. سەبەبى وسى ماسەلە ءتيىستى زاڭنامالاردا رەتتەلمەگەن»، - دەدى سەناتور جانبولات جورگەنبايەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

دەپۋتات سونىمەن قاتار كەيبىر اڭ اۋلاۋ شارۋاشىلىقتارى جەكە ادامداردىڭ نەمەسە شاعىن توپتاردىڭ مۇددەسى ءۇشىن عانا پايدالانىلاتىنىن، سوندىقتان مۇنداي اڭ اۋلاۋ سەرۋەندەرىنىڭ ۇلكەن الەۋمەتتىك جانە ەكونوميكالىق ماڭىزى جوق ەكەنىن اتاپ ءوتتى. اسىرەسە، مال جايۋعا ارنالعان جايىلىمدار تاپشى بولىپ وتىرعان كەزدە ونىڭ قيسىنى دا جوق.

جانبولات جورگەنبايەۆ وسىعان بايلانىستى يگەرىلمەگەن نەمەسە پايدالانىلمايتىن جەرلەردى تەكسەرىپ، تۇگەندەۋدى، سونداي- اق اڭ اۋلاۋعا ارنالعان جەرلەردى بەكىتۋ كەزىندە جەرگىلىكتى حالىقتىڭ مال جايۋ نەمەسە ءشوپ شابۋ ماسەلەلەرىن ەسكەرۋدى سۇرادى. سەناتور اڭشىلىق شارۋاشىلىقتارى اۋماعىنداعى سۋ كوزدەرىن تازارتۋ جانە اۋماقتى ورتتەن قورعاۋدى ماسەلەلەرىن دە كوتەردى.

اۆتور: رۋسلان عابباسوۆ


سوڭعى جاڭالىقتار