سەناتورلار ارال تەڭىزىندەگى جاعدايعا قاتىستى ۇسىنىس جاسادى
سەناتتىڭ جالپى وتىرىسىندا بۇل ماسەلەگە وراي پرەمەر- مينيستر ءاليحان سمايىلوۆتىڭ اتىنا ساۋال جولداندى، دەپ حابارلايدى قازاقپارات ءتىلشىسى.
«ارال تەڭىزى باسسەينىندە تۇراقتى تۇراتىن ادامداردىڭ اعزاسىندا ومىرلىك ماڭىزى بار دەنە مۇشەلەرىنىڭ فۋنكتسيونالدىق جاي- كۇيىندە وزگەرىستەر انىقتالىپ، ءتىپتى، پاتولوگيالىق اۋرۋلاردىڭ دامۋىنا دەيىنگى وزگەرىسكە ۇشىراپ جاتىر. وسىلايشا، ارالدىڭ قۇرعاۋى پلانەتارلىق اۋقىمداعى ەكولوگيالىق قاسىرەت بولىپ وتىر. ونى بارلىق ەلدەردىڭ، حالىقارالىق ۇيىمداردىڭ كۇش- جىگەرىن بىرىكتىرۋ ارقىلى عانا توقتاتۋعا بولادى. ەڭ الدىمەن، وسى ەكولوگيالىق داعدارىستى شەشۋگە حالىقارالىق قورلار مەن عىلىمي ورتالىقتاردى تارتۋ قاجەت. سوڭعى ۋاقىتتا ولاردىڭ ايماقتاعى بەلسەندىلىگى ايتارلىقتاي تومەندەپ وتىر»، - دەدى سەناتور اقىلبەك كۇرىشبايەۆ دەپۋتاتتىق ساۋالدى وقي وتىرىپ.
سەناتورلار ماسەلەنى شەشۋ ءۇشىن كەلەسى شەشىمدەردى ۇسىندى: حالىقارالىق ارالدى قۇتقارۋ قورىنىڭ جۇمىسىن جانداندىرۋ، ورتالىق ازيا ەلدەرىمەن سۋ- ەنەرگەتيكالىق كونسورتسيۋم قۇرۋ جانە قۇرعاپ قالعان تەڭىزدىڭ تۇبىنە جاسىل جەلەكتەردى بەلسەندىرەك وتىرعىزۋ.
«ارال تەڭىزىنىڭ قازاقستاندىق بولىگىندەگى تابيعي ەكپەلەردى قوسا العاندا، ورماننىڭ جالپى اۋدانى 337 مىڭ گەكتاردى قۇرادى. سونىمەن قاتار، ءبىزدىڭ وزبەك ارىپتەستەرىمىز شامامەن 1,6 ميلليون گا القاپقا سەكسەۋىل ەكپەلەرىن وتىرعىزدى. مۇنىمەن قوسا، ولار جۇيەلى تۇردە اعاش داقىلدارىنىڭ ءشولدى جاعدايلارىنا بەيىمدەلگەن تۇرلەرىن كەڭەيتۋمەن اينالىسۋدا. وسىعان بايلانىستى بىزگە اعاش وتىرعىزۋ جۇمىستارىنىڭ قارقىنىن جەدەلدەتىپ قانا قويماي، فيتومەليوراتيۆتىك تەحنولوگيالاردى دا جەتىلدىرۋ كەرەك»، - دەپ اتاپ ءوتتى ا. كۇرىشبايەۆ.
دەپۋتاتتاردىڭ ايتۋىنشا، ولار ءقازىردىڭ وزىندە ءوز وكىلەتتىكتەرى اياسىندا بۇل باعىتتا بەلسەندى جۇمىس ىستەپ جاتىر. سەناتورلار تاياۋدا عانا سولتۇستىك ارال سۋىن ۇستاپ تۇرعان كوكارال بوگەتىن جوندەۋ قاجەتتىلىگى تۋرالى ۇكىمەتكە ساۋال جولداعانىن ەسكە سالدى.
پارلامەنتارالىق ديپلوماتيانى ودان ءارى دامىتۋ اياسىندا ولار دۇنيەجۇزىلىك قوعامداستىقتىڭ نازارىن ارال پروبلەماسىنا اۋدارۋ ماقساتىندا ءتۇرلى حالىقارالىق پلاتفورمالاردا وسى ماسەلەلەردى كوتەرۋدى كوزدەپ وتىر.
