انشىمەن شاتاستىرىپ، ءان سۇرايتىندار كوپ - مەمقىزمەتشى باۋىرجان يسايەۆ

جەرگىلىكتى اكىمدىكتە قىزمەتىن اتقاراتىن ول، ءانشى باۋىرجان يسايەۆپەن اتتاس. ءارى تەگى دە بىردەي. سوندىقتان كوپشىلىك ونى «ءومىر تۇگىل، ءوزىمدى دە بىلمەيمىن» دەپ اندەتەتىن انشىمەن ءجيى شاتاستىرادى. باۋىرجان يبادۋللا ۇلى بۇعان دەيىن الماتىدا كاسىپپەن اينالىسقان.

سول كەزدەرى ارنايى قوڭىراۋ سوعىپ، «تويىمىزدا ءان سالىپ بەرسەڭىز» دەپ قولقا سالاتىندار كوپ كەزدەسكەن.

«باۋىرجان يسايەۆتىڭ اندەرى حيت بولىپ جاتقان كەز ەدى. ۇيالى تەلەفون دەگەن مۇلدەم جوق. بارشامىز ءۇي تەلەفونىن پايدالاندىق. بىردە سالىق باسقارماسىنان ۇيدەگىلەرگە حابارلاسىپ، تەز كەلۋىمدى ءوتىنىپتى. ءوزىم 10 كۇن بۇرىن عانا بۇكىل سالىعىمدى تولەپ قويعاندىقتان، ءبىر شيكىلىك ورىن العان شىعار دەپ ۋايىمدادىم. كاسىپكەر بولعان سوڭ، «دۇرىس تولەم جاسامادىم با؟» دەگەن كۇدىك تە كەلدى. بۇكىل قۇجاتىمدى جيناپ، ايتىلعان كابينەتكە باردىم. كەزەك كوپ ەكەن. ەكى ساعاتتاي كۇتىپ ىشكە كىردىم. سودان، شاقىرتۋ بويىنشا كەلىپ تۇرعانىمدى ايتسام، ولار «جاقىندا تويلاناتىن كاسىبي مەرەكەدە ءان سالىپ بەرسەڭىز» دەپ ۇسىنىس ايتىپ تۇر. سول كەزدە بارىپ، ءانشى باۋىرجان يسايەۆپەن شاتاستىرعانىن ءتۇسىندىم. جاعدايدى ايتىپ، جۇمىسىما كەتتىم»، - دەپ كۇلە ەسكە الدى باۋىرجان يسايەۆ.

تاعى بىردە ءۇي تەلەفونىنا حابارلاسقان ءىس-شارا ۇيىمداستىرۋشىسى باۋىرجان يسايەۆتى سۇرايدى. «تەز ارادا بىزگە حابارلاسسىن، ونى سىيلىققا ۇسىنىپ جاتىر ەدىك»، دەگەندە بارىپ جاعدايدى تۇسىنگەن اناسى، بالاسىنىڭ انشىمەن اتتاس ەكەنىن ايتقان. باۋىرجاننىڭ بۇگىنگى ماقساتى - تۋعان جەردى تۇلەتۋ. قازىر الماتىدان اۋىلىنا كەلىپ حالىققا قىزمەت ەتىپ ءجۇر. بۇل باعىتتاعى جۇمىستارعا بەلسەنە كىرىسكەن مەملەكەتتىك قىزمەتشى قازىردىڭ وزىندە جەرلەستەرىنىڭ ريزاشىلىعىنا بولەنىپ، العىسىن الۋدا.

اۆتور: قايرات زاينيشەۆ