قاراعاندى وبلىسىندا ورمان مەن دالالى القاپ ورتەنىپ جاتىر
وقيعا ورىندارىندا 300 گە جۋىق ادام، 44 تەحنيكا جانە 2 تىكۇشاق جۇمىس ىستەپ جاتىر، دەپ حابارلايدى قازاقپارات ءتىلشىسى.
قارقارالى اۋدانىنداعى قۋ ورمانشىلىعىنىڭ اۋماعىنداعى ءورتتى جويۋعا قاراعاندى وبلىسى توتەنشە جاعدايلار دەپارتامەنتىنىڭ، ورماندار مەن جانۋارلار دۇنيەسىن قورعاۋ جونىندەگى قۋ شارۋاشىلىعىنىڭ، جەرگىلىكتى اتقارۋشى ورگانداردىڭ، ورتكە قارسى ەرىكتى قۇرىلىمداردىڭ، جەرگىلىكتى پوليتسيا قىزمەتىنىڭ، ت ج م «قازاۆياقۇتقارۋ» ا ق، «قازاۆياورمانقورعاۋ» ر م ق ك، «التاي پوليمەتالى» ج ش س- نىڭ كۇشتەرى مەن قۇرالدارى جۇمىلدىرىلدى. ءورت ورنىندا بارلىعى 280 ادام، 44 بىرلىك تەحنيكا، 2 تىكۇشاق جۇمىس ىستەپ جاتىر.
ت ج م «قازاۆياقۇتقارۋ» اق اۆياتسياسىنىڭ كومەگىمەن سۋ شاشۋ جۇمىستارى جالعاسۋدا. 22-ماۋسىم ساعات 17:00 دەگى جاعداي بويىنشا 12 رەت سۋ شاشىلدى.
«قولعا الىنعان شارالاردىڭ ارقاسىندا الدىن الا بولجام بويىنشا 250 گ ا الاڭدا ءورت اۋىزدىقتالدى. تاۋلى جەرلەر، دالانى ءتۇتىن باسۋى، جەل باعىتىنىڭ وزگەرۋى ءورتتى ءسوندىرۋدى قيىنداتىپ وتىر. لاپىلداپ جانىپ جاتقان جەرلەر جوق. تەك بۇتالار مەن شوپتەر بىقسىپ جاتىر. قازىرگى ۋاقىتتا ءتۇتىن شىعىپ جاتقان جەرلەردى جويۋ جۇمىستارى جۇرگىزىلىپ جاتىر. ەلدى مەكەندەرگە ءقاۋىپ جوق. قازا بولعاندار مەن زارداپ شەككەندەر جوق»، - دەپ حابارلادى قاراعاندى وبلىسى ت ج د باسپا ءسوز قىزمەتى.
سونداي- اق، بۇقار جىراۋ اۋدانى اۋماعىنداعى بەلاعاش ورمان شارۋاشىلىعىندا 100 گ ا جانە 1,5 گ ا ورمان القاپتارىندا تۇتانعان قۇرعاق ءشوپتى ءسوندىرۋ جۇمىستارى جۇرگىزىلدى. ءورت 22-ماۋسىم كۇنى تاڭەرتەڭ اۋىزدىقتالدى. زارداپتاردى جويۋ بويىنشا جۇمىس جالعاسۋدا.
وقيعا ورنىنا قاراعاندى وبلىسى ت ج د- ءنىڭ 142 قىزمەتكەرى مەن 27 تەحنيكاسى، ق ر ت ج م- ءنىڭ 52859 اسكەري ءبولىمى، ورتكە قارسى ەرىكتى قۇرىلىمدارى، ورمان شارۋاشىلىعى جانە جەرگىلىكتى اتقارۋشى ورگاندارى جۇمىلدىرىلدى.
ايتا كەتۋ كەرەك، وسىدان ەكى كۇن بۇرىن قارقارالى اۋدانىندا، قوياندى اۋىلىنان سولتۇستىك- باتىسقا قاراي 20 شاقىرىم جەردە قۇرعاق ءشوپتىڭ ورتەنگەنى تۋرالى حابارلاما كەلىپ تۇسكەن. ءورتتى سوندىرۋگە 44 قىزمەتكەر مەن 7 تەحنيكا جۇمىلدىرىلدى. سونداي- اق تابيعي اپاتپەن كۇرەسكە 13 جۇمىسشى مەن 3 بىرلىك تەحنيكادان تۇراتىن ەرىكتى ورتكە قارسى قۇرامالار كومەكتەستى. الدىن الا مالىمەتتەر بويىنشا جالىن 1500 گەكتاردان استام اۋماقتى شارپىعان. ءبىر تاۋلىكتەن كەيىن قۇتقارۋشىلار ءورتتى ءسوندىردى.
